ৰঙাপৰা, 31 মে': বালিপৰাত দিন দুপৰতে সংঘটিত চুৰিৰ ঘটনা ৷ সমগ্ৰ চুৰিৰ ঘটনা বন্দী হৈ ৰ'ল চিচিটিভি কেমেৰাত ৷ ৰঙাপৰা-বালিপৰা পথৰ সমীপত সংঘটিত হয় এই চুৰিৰ ঘটনা ৷ বালিপৰাৰ এলাইট একাডেমীৰ সমীপৰ শৈলেন বসুমতাৰী নামৰ এগৰাকী লোকৰ ঘৰত শনিবাৰে দিনৰ ভাগত কোনো নথকাৰ সুযোগ লৈ দুৱাৰৰ তলা ভাঙি চোৰে দুটা ভৰ্তি গেছ চিলিণ্ডাৰ, কাঁহৰ বাচন-বৰ্তনকে ধৰি নগদ টকা লৈ উধাও হয় ৷
উল্লেখ্য যে, চোৰে ঘৰৰ ভিতৰত প্ৰৱেশ কৰাৰ পাচতে বন্ধ কৰি দিয়ে চিচিটিভি কেমেৰাটো ৷ ঘৰৰ মূল্যৱান সামগ্ৰীসমূহ লৈ অতি কৌশলেৰে চোৰে পলায়ন কৰে ৷ জানিব পৰা মতে, ইয়াৰ পূৰ্বেও একেজন লোকৰ ঘৰতে কেইবাবাৰো সংঘটিত হৈছে চুৰিৰ ঘটনা ৷ এই ঘটনাৰ পিচতে লোকজনে ঘৰত স্থাপন কৰিছিল চিচিটিভি কেমেৰা ৷ ঘটনা সম্পৰ্কত ভুক্তভোগী শৈলেন বসুমতাৰীয়ে চাৰিদুৱাৰ আৰক্ষী থানাত এখন এজাহাৰ দাখিল কৰিছে ৷ আৰক্ষীয়ে চোৰৰ সন্ধানত ইতিমধ্যে অনুসন্ধান অভিযান আৰম্ভ কৰিছে যদিও বৰ্তমানলৈ কোনো লোকক আটক কৰিবলৈ সক্ষম হোৱা নাই ৷
লগতে পঢ়কঃ এক বজাৰ শীৰ্ষ বাতৰি সমূহ
