তেজপুৰ,২৪ ফেব্ৰুৱাৰী: তাহানিৰ কথাবোৰে আপোনাকো হয়তো আমনি কৰে ৷ গাঁৱে চহৰে আজিৰ পৰা চাৰি দশক আগতে পুৱা গধুলি যোৱা ৰঙা ৰঙৰ দীঘল বাছ কেইখন দেখিলেই সকলোৱে চিনি পায় আসাম ট্ৰেন্সপৰ্টৰ বাছ বুলি ৷ কাৰণ সেইসময়ত অসমৰ পৰিবহন ব্যৱস্থা ইমান সূচল নাছিল ৷ ৰঙা ৰঙৰ বাছত গাত এটা দুৰন্ত গতিৰ গঁড়ৰ প্ৰতীক চিহ্ন লৈ অবিৰাম গতিত যাত্ৰা কৰা আসাম ট্ৰেন্সপৰ্টৰ বাছ সমূহ ক্ৰমান্বয়ে নাইকিয়া হৈ গ'ল যদিও তাৰ ঠাই ল'লে আধুনিক বাছসমূহে ৷ ASTCৰ বাছ মানেই গঁড়ৰ প্ৰতীক থকা বাছখন ৷
সময়ৰ পৰিৱৰ্তনৰ লগে লগে সকলো সলনি হৈছে ৷ সলনি মানুহৰ মন,পৰিৱেশ,পৰিস্থিতি ৷ কিন্তু কিছুমান ঘটনাই সময়ক কোবাই গৈছে ৷ 1971 চন, সেই সময়ৰ আসাম ট্ৰেন্সপৰ্ট, বৰ্তমানৰ অসম ৰাজ্যিক পৰিবহন নিগমৰ বাছ সমূহত নতুনকৈ সংযোজন হোৱা অসম গৌৰৱ এশিঙীয়া গঁড়ৰ চিত্ৰ অংকণ কৰিছিল তেতিয়াৰ আসাম ট্ৰেন্সপৰ্টৰ এগৰাকী কৰ্মচাৰী চৌকত আলীয়ে ৷ বহুতেই হয়তো নাজানে পৰিবহন নিগমক প্ৰাণৱন্ত কৰি তোলা প্ৰতীকটোৰ আঁৰৰ ব্যক্তিজনৰ কথা ৷ আমি কথা পাতিছিলো চৌকত আলীৰ সৈতে ৷ অনৰ্গলভাৱে থুকাথুকি মাতেৰে কৈ গৈছিল ইতিহাস যেন লগা কথাবোৰ....
সেই সময়ত আসাম ট্ৰেন্সপৰ্টৰ সঞ্চালক ভবেন হাজৰিকাই ১০২ টকাৰ পুৰস্কাৰ দিছিল চৌকত আলীক ৷ বিনা পাৰিশ্ৰমিকত অংকণ কৰি দিয়া পৰিবহন নিগমৰ সেই প্ৰতীকটো অথবা ক'লা ধোৱা উৰুৱাই পাৰ হৈ যোৱা পুৰণি বাছসমূহ ক্ৰমান্বয়ে নাইকিয়া হৈ গ'ল ৷ এটা যুগৰ সমাপ্তি হ'ল,কিন্তু ৰৈ গ'ল কিছু সোণালী স্মৃতি ৷ সময়ৰ সোঁতত চৌকত আলীৰ দুৰন্ত গঁড়টোৱে মানুহৰ মনত যি সাঁচ বহুৱাই গ'ল সেয়া আজিও সজীৱ হৈ আছে প্ৰতিজন লোকৰ মনত,পৰিবহন নিগমৰ বাছ মানেই এশিঙীয়া গঁড়ৰ প্ৰতীক ৷ কিন্তু বহুতেই হয়তে আজিও নাজানিলে চৌকত আলীক ৷ এসময়ৰ সুদক্ষ খেলুৱৈ,বহুমুখী প্ৰতিভাৰে সজ্জ্বল চৌকত আলীৰ বয়স এতিয়া 95 বছৰ ৷ ৰাজ্যৰ পৰিবহন নিগমক সজীৱ কৰি তোলা চৌকত আলীয়ে আগবঢ়োৱা অৱদানৰ কথা কিন্তু আজি সকলোৱে পাহৰিলে ৷ কিন্তু তথাপিও কোনো আক্ষেপ নাই এইগৰাকী নীৰৱ নায়কৰ ৷
পৰিবহন নিগমলৈ অনবৈদ্য বৰঙণি আগবঢ়োৱা চৌকত আলী যথেষ্ট সুখী তেওঁ অংকণ কৰা প্ৰতীকক লৈ ৷ ৰাজপথত যেতিয়া তেওঁ অঁকা দুৰন্ত গতিৰ গঁড়টো প্ৰতিখন বাছত গাঁৱে ভূঞে ভ্ৰমি ফুৰে তেতিয়া তেওঁৰ বুকুখন গৰ্বত উথলি উঠে ৷ ইটিভি ভাৰতৰ তৰফৰ পৰা এইগৰাকী শ্ৰষ্টাৰ দীৰ্ঘায়ু কামনা কৰিলো ৷
লগতে চাওকঃ
