তেজপুৰ, ১১ জুন : শোণিতপুৰ জিলাৰ অন্তৰ্গত সৰুপাত গাঁৱৰ এগৰাকী ৬৫ বছৰীয়া ক’ভিড (Covid) ৰোগত আক্ৰান্ত মহিলাক আশাকৰ্মীৰ সহযোগিতাত পৰিয়ালে চিকিৎসালয়ত ভৰ্তি কৰোৱা হৈছিল ৷ কিন্তু হঠাৎ ক’ভিড কক্ষৰ পৰা অন্তৰ্ধান হৈছিল ক’ভিড ৰোগীগৰাকী ৷ এই অভিযোগ উত্থাপন কৰিছিল সন্ধানহীন ক’ভিড ৰোগীৰ পৰিয়ালে ৷ এই বাতৰি সম্প্ৰচাৰ হৈছিল ইটিভি ভাৰতত ৷
ইটিভি ভাৰতৰ বাতৰিৰ পিছতেই শোণিতপুৰ জিলা উপায়ুক্তই এক দণ্ডাধীশ পৰ্যায়ৰ তদন্তৰ নিৰ্দেশ জাৰি কৰিছে । জিলা উপায়ুক্ত ভূপেছ চন্দ্ৰ দাসে ইটিভি ভাৰতক ফোন যোগে জনাই এই তথ্য। উপায়ুক্ত গৰাকীয়ে কয় যে, ইতিমধ্যে এগৰাকী দণ্ডাধীশৰ জৰিয়তে সমগ্ৰ বিষয় সম্পৰ্কে তদন্তৰ নিৰ্দেশ দিয়া হৈছে ।
উল্লেখ্য যে, ভুক্তভোগী পৰিয়ালে এজাহাৰ দাখিল কৰাৰ পিছতেই তেজপুৰ চিকিৎসা মহাবিদ্যালয়(Tezpur Medical College)ৰ মৰ্গত ৯ জুনত উদ্ধাৰ হৈছিল ক’ভিড ৰোগীগৰাকীৰ মৃতদেহ ৷ ঘটনাৰ অভিযোগ অনুসৰি, বিগত ২৬ মে’ত তেজপুৰ সৰুপাটগাঁৱৰ ধনমণি গোৱালা নামৰ ৬৫ বছৰীয়া মহিলা গৰাকী ক’ভিডত আক্ৰান্ত হোৱাত তেজপুৰ চিকিৎসা মহাবিদ্যালয় হাস্পতাল (Tezpur Medical College)ৰ ক’ভিড কক্ষত ভৰ্তি কৰোৱা হয় ৷ বিগত ৩ জুনলৈকে তেওঁ কভিড কক্ষতে আছিল ৷ কিন্তু ৪ জুনৰ পৰা হঠাৎ ক’ভিড কক্ষত ৰোগীগৰাকীক তেওঁৰ পুত্ৰ কৰ্মেশ্বৰ গোৱালাই বিচাৰি নাপাই হুৱাদুৱা লগায় ৷
পুত্ৰৰ অভিযোগ, চিকিৎসালয় কতৃপক্ষই ধনমণি গোৱালা নামৰ কোনো ৰোগীয়ে চিকিৎসালয়ত ভৰ্তি হোৱা নাই মন্তব্য কৰে ৷ হাস্পতাল কতৃপক্ষৰ এই মন্তব্য শুনি ক’ভিড ৰোগী ধনমণি গোৱালাৰ পুত্ৰ আচৰিত হৈ পৰে ৷
৪ জুনৰ পৰা মাতৃক বিছাৰি হাবাথুৰি খালে পুত্ৰই ৷ কিন্তু সন্ধান নাপালে মাতৃৰ ৷ সম্পূৰ্ণ ৫ টা দিন চিকিৎসালয় খনত মাতৃক বিচাৰি হাইৰান হৈ পৰে পুত্ৰ ৷ মাতৃ ধনমণিৰ মৃত্যু হ’ল নেকি ক’ভিডত সেয়াও নাজানিলে তেওঁৰ পুত্ৰই ৷ নজনালে চিকিৎসা মহাবিদ্যালয় কতৃপক্ষই ৷ কতৃপক্ষই ধনমনি গোৱালা নামৰ কোনো মহিলা চিকিৎসালয়ত ভৰ্তি হোৱাই নাই বুলি পৰিয়ালক কিয় মিছাকৈ ক’লে চিকিৎসা মহাবিদ্যালয়ৰ চিকিৎসক আৰু চিকিৎসাকৰ্মী সকলে ?
অৱশেষত উপায়ন্তৰ হৈ ৯ জুনত পুৱা তেজপুৰ শালনীবাৰী আৰক্ষীৰ ওচৰত কৰ্মেশ্বৰ গোৱালাই দাখিল কৰে এজাহাৰ ৷ তাৰ পাচতেই হুৱাদুৱা লাগে চিকিৎসা মহাবিদ্যালয় খনত ৷ ৯ জুনৰ বিয়লি ধনমনিৰ মৃতদেহ উদ্ধাৰ হয় চিকিৎসা মহাবিদ্যালয় হস্পিতাল (Tezpur Medical College)ৰ মৰ্গত ৷
উল্লেখ্য যে, বৃহস্পতিবাৰে বিয়লি প্ৰায় ১:৫৫ বজাত ধনমনি গোৱালাৰ মৃত্যু দেখুৱাইছে হাস্পতাল কতৃপক্ষই ৷ কিন্তু এতিয়াও ৰহস্যৰ আৱৰ্তত, বিগত ৫ দিনে ক’ত আছিল মৃত ধনমনি ? কিন্তু কিয় পৰিয়ালক জনোৱা নাছিল হাস্পতাল কতৃপক্ষই ?
এই ঘটনাৰ সন্দৰ্ভত আৰক্ষীয়ে আৰম্ভ কৰিছে তদন্ত ৷ তদন্তৰ পিছতহে পোহৰলৈ আহিব সকলো তথ্য ।
লগতে পঢ়ক: গভীৰ সংকটত ৰঙিয়াৰ বাছৰ মালিক আৰু কৰ্মচাৰী
