তেজপুৰ, 16 ছেপ্তেম্বৰঃ চুবুৰীয়া ৰাষ্ট্ৰ ভাৰত-চীনৰ সীমান্তত উত্তেজনা অব্যাহত থকাৰ সময়তেই পোহৰলৈ আহিছে আন এক ভয়ংকৰ তথ্য ৷ অৰুণাচল প্ৰদেশৰ উজনি সোৱণশিৰিৰ আচাপিলা গাঁৱৰ সীমান্তৰ পৰা বিগত ১৯ মাৰ্চত চীনৰ পিপলছ লিবাৰেচন আৰ্মীয়ে বন্দী কৰি নিছিল অৰুণাচল প্ৰদেশৰ যুৱক তগলে চিংসমক ৷ শেহতীয়া তথ্য অনুসৰি, চিংসমক উপৰ্যুপৰি শাৰীৰিক আৰু মানসিক অত্যাচাৰ চলাই আহিছিল চীনা সেনাই ৷ পৰৱৰ্তী সময়ত ভাৰতীয় সেনাৰ হাতত বুমলা পাছত গটাই দিয়া হৈছিল তগলে চিংসমক ৷
চকু হাত বান্ধি খোজ কঢ়াই এক অজ্ঞাত স্থানলৈ নি উপৰ্যুপৰি শাস্তি প্ৰদান কৰা হৈছিল তগলে চিংসমক ৷ আনকি বৈদ্যুতিক শ্বক পৰ্যন্ত দিয়া হৈছিল যুৱকজনক ৷ তেওঁৰ পৰা সীমান্তৰ তথ্য জানিবলৈ বিচাৰিছিল চীনা সৈন্যই ৷ চলিত বৰ্ষৰ মাৰ্চ মাহৰ প্ৰথম ভাগত ইটানগৰ চৰকাৰী হাইস্কুলত দশম শ্ৰেণীৰ পৰীক্ষা শেষ কৰি লক ডাউনৰ পূৰ্বে ঘৰলৈ আহিছিল তগলে চিংসম ৷ এই ঘটনাৰ পাছত এতিয়া ভয় আৰু শংকাৰ মাজত দিন পাৰ কৰিছে অৰুণাচল প্ৰদেশৰ তাগিন সম্প্ৰদায়ৰ যুৱক তগলে চিংসমে ৷ আনহাতে ইয়াৰ পিছত পুনৰ ৫ জন যুৱকক ২ ছেপ্টেম্বৰত বন্দী কৰি নিছিল চীনা সৈন্যই ৷ কিন্তু ভাৰতীয় সেনাৰ হেঁচাৰ বাবে 11 দিনৰ অন্তত ১2 ছেপ্টেম্বৰত আনজাও জিলাৰ কিবিথোত যুৱককেইজনক গটাই দিয়ে চীনা সৈন্যই ৷ সম্প্ৰতি যুৱককেইজনক কোৱাৰেন্টাইনত ৰখা হৈছে ৷
উল্লেখ্য যে, প্ৰতিৰক্ষা মন্ত্ৰী ৰাজনাথ সিঙে মঙলবাৰে সদনৰ মজিয়াত বক্তব্য ৰাখি কৈছিল যে, চীনা সৈন্যই প্ৰায় ২০ কিলোমিটাৰ দূৰত্বত বাহৰ কৰি আহিছে ৷ ভাৰতীয় সৈন্যই ইয়াক প্ৰতিৰোধ কৰি আহিছে আৰু আগলৈয়ো কৰি যাব ৷ ইয়াৰ উপৰিও ডিবাং উপত্যকাৰ সীমান্তৰ বিশিং অঞ্চলৰ ওচৰত চীনা কমিউনিষ্ট পাৰ্টিৰ সহযোগত চীনা সৈন্যই কেইবাটাও নতুন পথ নিৰ্মাণ কৰাৰ আলোকচিত্ৰ কৃত্ৰিম উপগ্ৰহৰ জৰিয়তে লাভ কৰিব পৰা গৈছে ৷ পাছিঘাটৰ কংগ্ৰেছৰ বিধায়ক আৰু প্ৰাক্তন কেন্দ্ৰীয় মন্ত্ৰী এৰিঙৰ মতে সীমান্তৰ ডিবাং ভেলীৰ আইটিবিপিৰ শেষ নিৰীক্ষণ শিবিৰৰ ডিম্বেনৰ পৰা প্ৰায় ১০০ কিলোমিটাৰ দূৰত্বত এই পথ নিৰ্মাণ কৰিছে চীনা সৈন্যই ৷ তাৎপৰ্যপূৰ্ণ যে ইতিমধ্যে আনজাও জিলাৰ এণ্ডাৰীলা আৰু কিবিথো অঞ্চলত ভাৰতীয় সেনাই আধিপত্য বিস্তাৰ কৰিছে ।
লগতে পঢ়ক-পূজাত কি কৰিব, কি নকৰিব: চৰকাৰে জাৰি কৰিলে নিৰ্দেশনা
