তেজপুৰ, ২২ জুলাই : ৰাজ্যৰ শান্তি-শৃংখলাৰ ক্ষেত্ৰত ৰাজ্য চৰকাৰৰ বৃহৎ সফলতা ৷ বৃহস্পতিবাৰে বিদ্ৰোহী সংগঠন নেচনেল লিবাৰেচন ফ্ৰণ্ট অৱ বড়োলেণ্ড (National Liberation Front of Boroland)ৰ মুৰব্বী এম বাথা(M Batha)ই আত্মসমৰ্পণ কৰাৰ পূৰ্ণ সম্ভাৱনা পোহৰলৈ আহিছে । প্ৰাপ্ত তথ্য মতে, এনএলএফবি(NLFB) মুৰব্বী গৰাকীয়ে তেওঁৰ কেডাৰসকলৰ সৈতে ওদালগুৰি জিলাৰ অসম-অৰুণাচল প্ৰদেশৰ সীমান্ত হৈ মাজবাটত অসম আৰক্ষীৰ সন্মুখত আত্মসমৰ্পণ কৰিব ।
উল্লেখ্য যে , 2020 চনৰ 27 জানুৱাৰীত তৃতীয় খন বড়ো শান্তি চুক্তি স্বাক্ষৰ হোৱাৰ আগে আগে নেচনেল ডেমক্ৰেটিক ফ্ৰণ্ট অৱ বড়োলেণ্ড(National Democratic Front of Boroland) মূল সুঁতিলৈ ঘূৰি আহিছিল ৷ সেই সময়ত এম বাথাই প্ৰথমতে শান্তি চুক্তিৰ বাবে আত্মসমৰ্পণ কৰিছিল ৷ কিন্তু, পৰৱৰ্তী সময়ত পুনৰ হাতত অস্ত্ৰ তুলি এনএলএফবিৰ জৰিয়তে তেওঁ সশস্ত্ৰ সংগ্ৰামৰ পথ বাছি লৈছিল ৷
মন কৰিব লগীয়া বিষয় যে, মুখ্যমন্ত্ৰী ড৹ হিমন্ত বিশ্ব শৰ্মাই দিছপুৰৰ শাসনৰ বাঘজৰী হাতত লোৱাৰ পৰাই উগ্ৰপন্থী সমস্যা নিৰ্মূলৰ বাবে তৎপৰতা দেখুৱাই আহিছে ৷ বিদ্ৰোহী সংগঠন আলফা(ULFA)ৰ সৈতে শান্তি আলোচনাৰ ক্ষেত্ৰতো মুখ্যমন্ত্ৰী গৰাকীয়ে নিজৰ সুহৃদয়তা ইতিমধ্যে প্ৰকাশ কৰিছে ৷ ইফালে, ৰাজ্য শাসনত অহাৰ পূৰ্বেৰে এম বাথা সম্পৰ্কতো মুখ্যমন্ত্ৰী গৰাকীয়ে বহু সময়ত বিভিন্ন বিস্ফোৰক মন্তব্য কৰি অহা পৰিলক্ষিত হৈছিল ৷ এতিয়া, বিদ্ৰোহী নেতা গৰাকীৰ আত্মসমৰ্পণৰ খবৰে সেইবাবে যথেষ্ট তাৎপৰ্য বহন কৰে ৷
লগতে পঢ়ক : পুনৰ দিল্লীত উৎপীড়নৰ বলি উত্তৰ-পূৱৰ যুৱতী
