তেজপুৰ,19 ছেপ্টেম্বৰঃ ৰত্নাকৰৰ বাবে বিনা পাৰিশ্ৰমিকেৰে কাম কৰিছে জুবিন গাৰ্গে ৷ তেজপুৰৰ বিভিন্ন মহাবিদ্যালয়ত ৰত্নাকৰ চলচ্চিত্ৰৰ প্ৰচাৰ চলাবলৈ গৈ এইদৰে মন্তব্য আগবঢ়ালে জনপ্ৰিয় অভিনেতা যতীন বৰাই ৷
লগতে তেওঁ উল্লেখ কৰে যে,'মিছন চাইনা'ৰ প্ৰতি দৰ্শকৰ অভূতপূৰ্ব সঁহাৰি দেখি ৰত্নাকৰ ছবিখন কৰিবৰ বাবে মন মেলিছিল যতীন বৰাই ৷ তাৰ বাবেই জুবিন গাৰ্গক প্ৰশংসা আৰু ধন্যবাদেৰে উপচাই পেলালে যতীন বৰাই ৷ যতীন বৰাৰ বহু চৰ্চিত ছবি ৰত্নাকৰৰ প্ৰচাৰ চলাবলৈ গৈ এজাক ছাত্ৰীৰ মাজত আপ্লুত হৈ পৰে ৰত্নাকৰৰ কলা-কুশলীসকল ৷ ছাত্ৰী সকলৰ মাজত উপস্থিত হৈ নিজৰ প্ৰিয় ফুল ভেট ফুল বুলি ছাত্ৰীসকলক আখ্যা দিয়ে বৰষাৰাণী বিষয়াই ৷ বৃহস্পতিবাৰে তেজপুৰত লোকপ্ৰিয় গোপীনাথ বৰদলৈ কন্যা মহাবিদ্যালয়, দৰং মহাবিদ্যালয় আৰু তেজপুৰ মহাবিদ্যালয়ত ৰত্নাকৰৰ প্ৰচাৰ চলোৱাৰ উপৰিও তেজপুৰ বিশ্ববিদ্যালয়তো প্ৰচাৰ কাৰ্যসূচীত অংশ গ্ৰহণ কৰে টিম ৰত্নাকৰে ৷
