তেজপুৰ, ৭ আগষ্ট : আবকাৰী বিভাগৰ বৃহৎ সফলতা । শোণিতপুৰ জিলাত আবকাৰী বিভাগৰ অভিযানত পুনৰ জব্দ হ'ল বৃহৎ পৰিমাণৰ অৰুণাচলৰ সুৰা । শনিবাৰে আবকাৰী বিভাগে অভিযান চলাই অৰুণাচলৰ পৰা সৰবৰাহ কৰা সুৰাখিনি জব্দ কৰিবলৈ সক্ষম হয় ।
তেজপুৰ আবকাৰী বিভাগে অৰুণাচল প্ৰদেশৰ পৰা সৰবৰাহ কৰা ৪৫ কাৰ্টন বিলাতী সুৰা জব্দ কৰিবলৈ সক্ষম হয় । জানিব পৰা মতে জম্মু-কাশ্মীৰ অভিমুখে যাত্ৰা কৰা ট্ৰাক এখনৰ গোপন চেম্বাৰত অনা হৈছিল এই সুৰা খিনি । এই সুৰাখিনিৰ মূল্য ১ লাখ টকা হ'ব বুলি জানিবলৈ দিয়ে অৱকাৰী বিভাগে ।
আনহাতে, লখিমপুৰ জিলাতো জব্দ বৃহৎ পৰিমাণৰ অৰুণাচলৰ সুৰা । অৰুণাচল প্ৰদেশৰ পৰা গোপনে কৰ ফাঁকি দি সৰবৰাহ কৰা সুৰা খিনি বান্দৰদেৱাত জব্দ কৰে আবকাৰী বিভাগে ।
জব্দ কৰা প্ৰায় ৮৫০ কাৰ্টন বিলাতী সুৰাৰ মূল্য প্ৰায় ১২ লাখ টকা হ'ব বুলি জানিব পৰা গৈছে । উল্লেখ্য যে বিগত বহু দিন ধৰি অৰুনাচলী সুৰাৰ অবৈধ সৰবৰাহৰ বিৰুদ্ধে লখিমপুৰ আবকাৰী বিভাগে অভিযান অব্যাহত ৰাখিছে । আনহাতে এই ধৰণৰ অভিযান আগলৈও চলি থাকিব বুলি জানিবলৈ দিয়ে লখিমপুৰ আবকাৰী বিভাগে ।
লগতে পঢ়ক:ড্ৰাগছ মাফিয়াৰ টোপনিৰ কাঢ়িছে নামৰূপৰ এগৰাকী আৰক্ষী বিষয়াই
