তেজপুৰ, ২২ ফেব্ৰুৱাৰী: অৰুণাচল প্ৰদেশৰ ৰাজ্যপাল ব্ৰিগেডিয়াৰ (ডঃ) বি ডি মিশ্ৰক সাক্ষাৎ কৰিলে তেজপুৰত থকা ভাৰতীয় সেনাৰ চতুৰ্থ কৰ্পছৰ জেনেৰেল অফিচাৰ কামাণ্ডিং লেফটেনেণ্ট জেনেৰেল ৰবীন খ'ছলাই । খ'ছলাই কাৰ্যভাৰ গ্ৰহণ কৰাৰ পিছত সোমবাৰে প্ৰথমবাৰৰ বাবে ইটানগৰ ৰাজভৱনত ৰাজ্যপালগৰাকীক সাক্ষাৎ কৰে । ৰাজ্যখনৰ বিভিন্ন ক্ষেত্ৰৰ সুৰক্ষাৰ বিষয়ে আলোচনা কৰাৰ লগতে সেনা আৰু স্থানীয় লোকৰ মাজত সম্পৰ্কৰ বিষয়েও তেওঁলোকে আলোচনা কৰে ।
এই আলোচনাত ৰাজ্যপালগৰাকীয়ে তিনিখন জিলাৰ অন্তৰ্গত ৰ'য়িং, সোণাপুৰা, নামচাই আৰু মহাদেৱপুৰ আৰক্ষী থানাৰ অধীনৰ অঞ্চলৰ লোকসকলে উগ্ৰপন্থী সমস্যাৰ সৈতে মোকাবিলা কৰি আছে বুলি জনায় সেনা বিষয়াগৰাকীক । এই ক্ষেত্ৰত কটকটীয়া নিৰীক্ষণৰ ব্যৱস্থা কৰা হৈছে যদিও এচাম লোকে হিংসাত্মক কাৰ্যকলাপৰ জৰিয়তে উন্নয়নমূলক কাম-কাজ কৰাত অসুবিধাৰ সৃষ্টি কৰিছে ।
ৰাজ্যবাসীৰ সুৰক্ষাক লৈ চিন্তা ব্যক্ত কৰি ৰাজ্যপালগৰাকীয়ে কয় যে, প্ৰতি ইঞ্চি ভূমিৰ নিৰাপত্তা সুনিশ্চিত কৰিব লাগিব আৰু একে সময়তে জনসাধাৰণক নিৰাপত্তা দিব লাগিব । ৰাজ্যপাল মিশ্ৰই ইন্টেলিজেঞ্চ, সেনা আৰু আৰক্ষীৰ সহযোগিতাত প্ৰয়োজনীয় ব্যৱস্থা গ্ৰহণ কৰাৰ বাবে আহ্বান জনায় । লেফটেনেণ্ট জেনেৰেল ৰবীন খ'ছলাক সেনা আৰু স্থানীয় লোকৰ মাজত সম্পৰ্ক স্থাপন কৰাৰ লগতে স্থানীয় লোকক প্ৰয়োজনীয় চিকিৎসাৰ সুবিধা প্ৰদান কৰিবলৈও পৰামৰ্শ দিয়ে ।
লগতে পঢ়ক:দক্ষিণ শালমাৰাত প্ৰতিবাদী কাৰ্যসূচী ৰূপায়ণ ছাত্ৰ সন্থাৰ
