তেজপুৰ,4 জানুৱাৰী: ভাৰতীয় সেনাৰ সামৰিক অভিযন্তা সেৱাৰ অধীনত গ্যাৰিচন ইঞ্জিনিয়াৰ (দক্ষিণ) তেজপুৰে,তেজপুৰ 4 ক'ৰ (4 corps) ৰ সেনাৰ চৌহদত প্লাষ্টিক আৰু পেলনীয়া সামগ্ৰীৰ জৰিয়তে নিৰ্মাণ কৰিছে বিশেষ পথ ৷ এইধৰণৰ পেলনীয়া সামগ্ৰীৰে পথ নিৰ্মাণৰ কাম ইতিমধ্যে বিভিন্ন ঠাইত আৰম্ভ হৈছে যদিও ভাৰতীয় সেনাবাহিনীৰ ঘাটিত গ্যাৰিচন ইঞ্জিনিয়াৰৰ বাবে এইয়া প্ৰথম বাৰৰ বাবে সম্ভৱ হৈ উঠিছে ৷
সোমবাৰে তেজপুৰ 4 ক'ৰৰ ভিতৰৰ জি অ চি ৰ কার্যালয়ৰ আৰু চীফ ষ্টাফৰ কাৰ্যালয়ৰ পথ নিৰ্মাণ কৰে সেনাৰ গ্যাৰিচন ইঞ্জিনীয়াৰ গ্ৰুপে ৷ এনেধৰণৰ পথ সমুহক অত্যাধিক বৰষুণ বা বৰফেও অনিষ্ট সাধন কৰিব নোৱাৰে বুলি জনাইছে পথ নিৰ্মাতা সকলে ৷
উল্লেখযোগ্য যে,পৰৱৰ্তী সময়ত সেনাৰ মিলিটেৰী ইঞ্জিনীয়াৰ চাৰ্ভিছে অন্য পেলনীয়া সামগ্ৰী যেনে,পুৰণা টায়াৰ আৰু বাঁহ ব্যৱহাৰ কৰি পথ নিৰ্মাণ কৰিব বুলি জানিবলৈ দিয়ে তেজপুৰৰ গ্যাৰিচন ইঞ্জিনীয়াৰ ৰবি ৰঞ্জনে ৷
সুস্থ সামাজিক বাতাবৰণ বৰ্তাই ৰখাৰ বাবে শেহতীয়াকৈ পথ নিৰ্মাণৰ ক্ষেত্ৰত সেনাই যি ব্যৱস্থা গ্ৰহণ কৰিছে সেইয়া জনসাধাৰণৰ বাবে ফলপ্ৰসূ হ'ব বুলি জনাইছে ৰবি ৰঞ্জনে ৷ মূলত আৱৰ্জনা নাশ কৰা আৰু পৰিৱেশৰ ওপৰত অত্যাধিক বোজা হ্ৰাস কৰাৰ উদ্দেশ্য আৰম্ভ কৰা হৈছে এই ধৰণৰ অভিনৱ পথ নিৰ্মাণৰ কাম ৷
