ৰঙাপৰা,২২ আগষ্ট : ৰাজ্যৰ ভিন্ন প্ৰান্তত ড্ৰাগছ (Drugs) তথা নিচাজাতীয় সামগ্ৰীৰ বিৰুদ্ধে অসম আৰক্ষীৰ (Assam Police) অভিযান অব্যাহত আছে । কিন্তু তাৰ মাজতে অসম আৰক্ষীৰ বাবে এক উদ্বেগৰ খবৰ । কিয়নো এইবাৰ নিচাজাতীয় সামগ্ৰীৰ ব্যৱসায়ত নামিছে খোদ আৰক্ষীৰ লোক । নিষিদ্ধ গাঞ্জা সৰবৰাহ কৰি শোণিতপুৰ জিলাত এইবাৰ আটক হ'ল এগৰাকী আৰক্ষী জোৱান ।
গাঞ্জাসহ ঠেলামাৰাত আটক হয় ২৪ আইআৰবিএন (24 IRBN)ৰ জোৱানজন । জোৱানজনৰ নাম তপন দাধৰা বুলি জানিব পৰা গৈছে । ৰিংকু নাথ নামৰ এগৰাকী গৃহৰক্ষী জোৱানৰ তৎপৰতাত আটক গাঞ্জা সৰবৰাহকাৰী আৰক্ষী জোৱানগৰাকী ।
উল্লেখ্য যে, এখন মটৰ চাইকেলত গাঞ্জাখিনি লৈ আহিছিল অভিযুক্ত তপন দাধৰাই । গৃহৰক্ষী জোৱানজনে প্ৰত্যক্ষ কৰি পিছে পিছে খেদি গৈছিল আৰু হাতে লোটে ধৰা পেলাই আৰক্ষী জোৱানজনক । পাছত ঢেকিয়াজুলি আৰক্ষী থানাৰ গৃহৰক্ষী জোৱান ৰিংকু নাথে ঠেলামাৰা আৰক্ষীক খবৰ দিয়ে । ঘটনাস্থলীত ঠেলামাৰা আৰক্ষী উপস্থিত হৈ আৰক্ষী জোৱানজনক আটক কৰিবলৈ সক্ষম হয় ।
গাঞ্জাখিনিৰ পৰিমাণ প্ৰায় ৮ কেজি আছিল বুলি জানিব পৰা গৈছে । ইফালে গৃহৰক্ষী জোৱান ৰিংকু নাথক ২০ হাজাৰ টকাৰ প্ৰলোভনো দিছিল 24 IRBNৰ জোৱানজনে । কিন্তু প্ৰলোভনলৈ কেৰেপ নকৰি ৰিংকুৱে কৰায়ত্ত্ব কৰে অভিযুক্ত আৰক্ষীজনক । আৰক্ষী জোৱান এনেদৰে নিষিদ্ধ গাঞ্জা সৰবৰাহত জড়িত হোৱাৰ খবৰ বিয়পি পৰাৰ লগে লগে তীব্ৰ উত্তেজনাই বিৰাজ কৰিছে সমগ্ৰ জিলাখনত ।
লগতে পঢ়ক : কলগাছিয়াত এখন ট্ৰেক্টৰে লগাইছে তিনি ব্যক্তিৰ মাজত পয়মাল
