তেজপুৰ,12 জুনঃ দিহিং পাইকাইক লৈ অসমত যি এক আন্দোলনমুখৰ পৰিস্থিতিৰ সৃষ্টি হৈছে তাক লৈ ইটিভি ভাৰতৰ সাংবাদিকৰে সৈতে এক আছুতীয়া সাক্ষাৎকাৰ প্ৰদান কৰে বনমন্ত্ৰী পৰিমল শুক্লবৈদ্যই ৷ এই আছুতীয়া সাক্ষাৎকাৰত তেওঁ কয় যে,বৰ্ষাৰণ্যখনৰ চালেকি পি আৰ এফত 1973 চনৰ পৰা 2003 চনলৈ 30 বছৰৰ বাবে 58 হেক্টৰ মাটিত কয়লা খননৰ অনুমতি দিয়া হৈছিল ৷ ইয়াৰ পিচত পুনৰ এক আবেদনৰ পিচত কেন্দ্ৰীয় চৰকাৰৰ দ্বাৰা 10 বছৰৰ বাবে বৃদ্ধি কৰি 2023 চনলৈ 58 হেক্টৰৰ লগত আৰু 41 হেক্টৰ মাটি সংযোগ কৰা হয় ৷ কেন্দ্ৰীয় চৰকাৰে মুঠ 28 টা চুক্তিৰ ভিত্তিত অনুমতি প্ৰদান কৰিছিল যদিও, অসম চৰকাৰৰ বা বন বিভাগে কোনো জৈৱ বৈচিত্ৰ ধ্বংস কৰাৰ বাবে কাকো অনুমতি দিয়া নাই আৰু কৰিব নিদিয়ে |
ৰাজহ ভূমিতহে খনৰৰ অনুমতি প্ৰদান কৰা হৈছিল অভয়াৰণ্যৰ মাটিত নহয় ৷ মন্ত্ৰীগৰাকীয়ে উল্লেখ কৰা অনুসৰি তেওঁলোকৰ চৰকাৰে খনন কাৰ্যৰ বাবে কোনো ধৰণৰ অনুমতি প্ৰদান কৰা নাই ৷ বিজেপিৰ চৰকাৰ অহাৰ পিচতে কোনো ধৰণৰ খনন কাৰ্য হোৱা নাই ৷ কিন্তু 2003 চনৰ পৰাই 58 হেক্টক মাটিত অবৈধভাৱে খনন কাৰ্য চলিছে বুলিও উল্লেখ কৰে বনমন্ত্ৰী গৰাকীয়ে ৷ বিজেপি চৰকাৰ থকালৈ কোনো বনাঞ্চল ধ্বংস কৰি খনন কৰিবলৈ দিয়া নহ'ব ৷ ইয়াৰ বাবে ইতিমধ্যে এখন বিভাগীয় কমিটি গঠন কৰা হৈছে পুংখানুপুংখ তদন্তৰ বাবে ৷ বনাঞ্চল ধ্বংস হ'ব পৰা কোনো কামেই কৰা নহ'ব ৷ দিহিং পাটকাইৰ চালেকি ৰেঞ্জকো ধ্বংসৰ কবলৰ পৰা যিকোনো প্ৰকাৰেই ৰক্ষা হ'ব ৷ কিয়নো এক সুন্দৰ পৰিৱেশ নিৰ্মাণৰ বাবে বিজেপি চৰকাৰে কাম কৰি আছে ৷ লগতে পৰিৱেশ সংবেদনশীল অঞ্চলৰ পৰিসৰ বৃদ্ধি আৰু হ্ৰাসৰ বিষয়েও মন্তব্য কৰে মন্ত্ৰী পৰিমল শুক্লবৈদ্যই ৷
ইয়াৰোপৰি মন্ত্ৰীগৰাকীয়ে অতি শীঘ্ৰেই বন বিভাগৰ প্ৰায় এঘাৰশ ভিন্ন পদত সম্পূৰ্ণ অনিয়ম মুক্তভাৱে অসমৰ নিৱনুৱা যুৱক-যুৱতীক নিযুক্তি প্ৰদান কৰা হ'ব বুলিও উল্লেখ কৰে ৷ বানপানীৰ মুকবিলা কৰিবলৈ ৰাষ্ট্ৰীয় উদ্যানৰ বাবে এইবাৰ বনবিভাগে ৩০০ খন দেশীয় নাও আৰু 21টা নতুন যন্ত্ৰচালিত নাৱৰ ব্যৱস্থা কৰিছে ৷
লগতে পঢ়কঃ অসমৰ জৈৱ-বৈচিত্ৰলৈ অহা ভাবুকিক অইল ইণ্ডিয়াই কেৰেপ নকৰেঃ ভাস্কো ডি শইকীয়া
