চিটাৰা ডেস্ক, 28 নৱেম্বৰ : তেজপুৰ বায়ুসেনা ঘাটিত দৃশ্য গ্ৰহণ সমাপ্ত কৰি টীম ফাইটাৰ উভতিল পৰৱৰ্তী সূচীলৈ । প্ৰিয় তাৰকাক ওচৰৰ পৰা চাবলৈ পুৱাৰে পৰা তেজপুৰ বিমান বন্দৰত ভিৰ কৰিলেহি অনুৰাগীয়ে ৷ জনপ্ৰিয় অভিনেতা অনিল কাপুৰে তেজপুৰৰ সদৃশ কোনো ঠাই নাই বুলিয়েই উল্লেখ কৰিলে সাংবাদিকৰ আগত ৷ জনতাৰ আতিথ্যত আপ্লুত হৈ বহু প্ৰশংসা কৰিলে অভিনেতা জনে ৷ অনিল কাপুৰৰ লগতে দীপিকা আৰু হৃত্বিকেও সকলোকে সম্ভাষণ জনাই বিদায় লয় অসমৰ পৰা ৷
বিগত 15 নৱেম্বৰৰ পৰা ছবিখনৰ সৈতে জড়িত প্ৰায় 150 ৰো অধিক কলা কুশলীয়ে একেলগে তেজপুৰ বায়ুসেনা ঘাটিত ছবিখনৰ শ্বুটিঙত ব্যস্ত আছিল ৷ 28 নৱেম্বৰত তেজপুৰ বিমানবন্দৰৰ পৰা পৰৱৰ্তী সুচাৰ বাবে উৰা মাৰে টীম ফাইটাৰ । বায়ুসেনা বাহিনীৰ জীৱনৰ ওপৰত নিৰ্মান কৰা ছবিখনত হৃত্বিকে এগৰাকী উইং কামাণ্ডাৰৰ চৰিত্ৰত অভিনয় কৰিছে । নিৰ্মাতাই বৰ্তমানলৈকে অন্য চৰিত্ৰসমূহৰ কথা মুকলিকৈ প্ৰকাশ কৰা নাই ৷
বিমানবনন্দৰত পুৱাৰে পৰা ৰৈ থকা অনুৰাগী সকলে তাৰকা কেইগৰাকীক কৰমর্দন কৰিবলৈ পাই আনন্দত আত্মহাৰা হৈ পৰে । বলীউডৰ তাৰকা অনিল কাপুৰে তেজপুৰ বায়ুসেনা ঘাটিৰ এখন বিদ্যালয়ৰ ছাত্ৰ-ছাত্ৰীৰ মাজত শনিবাৰে দিনটো কটায় । বিদ্যালয় পুথি ভঁৰালত উপস্থিত হৈ ছাত্ৰ-ছাত্ৰীসকলৰ লগত মত বিনিময় কৰাৰ লগতে অটোগ্ৰাফো দিয়ে অভিনেতা গৰাকীয়ে । অভিনেতা হৃত্বিকৰ লগতে অনিল কাপুৰে নিজৰ চৰিত্ৰটোৰ বাবে প্ৰস্তুতিৰ অংশ হিচাপে তেজপুৰ এয়াৰ বেছৰ কৰ্মীসকলৰ সৈতে সৈতে ঘনিষ্ঠভাৱে সময় কটায় ।
15 নৱেম্বৰৰ পৰা আৰম্ভ হোৱা ‘ফাইটাৰ’ৰ শ্বুটিঙৰ অসম সূচীৰ যোৱাকালি সামৰণি পৰে । সিদ্ধাৰ্থ আনন্দৰ পৰিচালনাত নিৰ্মিত ছবি ‘ফাইটাৰ’ত হৃত্বিক, অনিল কাপুৰ আৰু দীপিকা পাডুকনে মুখ্য চৰিত্ৰত অভিনয় কৰিছে । 2024 চনৰ 25 জানুৱাৰীত মুক্তি পাব এক্সন ধৰ্মী ছবি ‘ফাইটাৰ’ (Fighter release date) ৷
লগতে পঢ়ক : লাকী আলী-নীলোৎপলৰ সংগীতানুষ্ঠানেৰে সামৰণি পৰিল মাজুলী মিউজিক ফেষ্টিভেলৰ
