ৰঙাপৰা,21 মে’: কৰ’ণা মহামাৰীৰ সংক্ৰমণৰ প্ৰতি লক্ষ্য ৰাখি ৰাজ্য চৰকাৰে জাৰি কৰা সান্ধ্য আইনৰ সুৰুঙা লৈ ৰাজ্যৰ ভিন্ন প্ৰান্তত একাংশ দুষ্টচক্ৰই চলাই আছে মদ, জুৱা তথা ড্ৰাগছৰ ৰমৰমীয়া বেহা ।
দীৰ্ঘদিন ধৰি আৰক্ষী প্ৰশাসনৰ চকুত ধুলি দি এই অসাধু চক্ৰই চলাই আছে নিচাযুক্ত দ্ৰব্যৰ অবাধ বেহা । শেহতীয়াকৈ শোণিতপুৰ জিলাৰ লখৰাত চাৰিদুৱাৰ আৰক্ষীয়ে এক অভিযান চলাই বৃহৎ পৰিমাণৰ ব্ৰাউন চুগাৰসহ দুজন লোকক আটক কৰিছে ।
এক গোপন সূত্রৰ পম খেদি চাৰিদুৱাৰ আৰক্ষীয়ে লখৰাৰ ৰাজপথত তালাচী চলাই থকাৰ সময়তে এখন তীব্ৰবেগত আহি থকা নম্বৰপ্লেটবিহীন এল্ট’ গাড়ীক ৰ’বলৈ নিৰ্দেশ দিয়ে আৰক্ষীয়ে ৷ গাড়ীখনে আৰক্ষীৰ নিৰ্দেশ নামানি তীব্ৰবেগত পলায়নৰ চেষ্টা কৰে ৷ ঘটনাস্থলীত উপস্থিত থকা আৰক্ষীৰ দলে খেদি খেদি চালকসহ গাড়ীখন কৰায়ত্ত কৰিবলৈ সক্ষম হয় ৷
উক্ত বাহনখনৰ পৰা আৰক্ষীয়ে ১ পেকেট ব্ৰাউন চুগাৰ আৰু ৯০ টা ড্ৰাগছৰ কণ্টেইনাৰ উদ্ধাৰ কৰে । আৰক্ষীয়ে লগতে গাড়ীখনত থকা দুজন লোককো কৰায়ত্ত কৰে । ধৃত লোক দুজন ক্ৰমে জংচৰ দেউৰী(২৩) আৰু অৰুণাচলৰ বমডিল্লাৰ টাচি জেৰাং বুলি জানিব পৰা গৈছে । জব্দ কৃত সামগ্ৰীখিনিৰ মূল্য আনুমানিক এক লাখ টকা ৷
সম্প্ৰতি চাৰিদুৱাৰ আৰক্ষীৰ জিন্মাত থকা ড্ৰাগছ সৰবৰাহকাৰী যুৱকদ্বয়ে খনামুখৰ চনু নামৰ এজন লোকৰ পৰা ড্ৰাগছখিনি অনা বুলি ইতিমধ্যে স্বীকাৰোক্তি দিছে । বাতৰি লিখা পৰ্যন্ত অধিক তথ্যৰ বাবে আৰক্ষীয়ে লোক দুজনক সোধ-পোছ অব্যাহত ৰাখিছে ।
লগতে পঢ়ক: চৰাইদেউত ড্ৰাগছ সৰবৰাহী আটক
