তেজপুৰ,২২জুলাই: এই নিষেধাজ্ঞা অনুসৰি এতিয়াৰে পৰা সমগ্ৰ জিলাখনত গাহৰিৰ সৰবৰাহ, ব্যক্তিগত ভাৱে গাহৰি ইঠাইৰ পৰা সিঠাইলৈ কঢ়িওৱা সম্পূৰ্ণৰূপে নিষিদ্ধ কৰিছে । তদুপৰি গাহৰি বধ কৰা বা বিক্ৰী কৰা, গাহৰি মাংসৰ আন্তঃজিলা সৰবৰাহ, গাহৰিৰ মুক্ত বিচৰণ তথা অন্য ঘৰচীয়া গাহৰিৰ সংস্পৰ্শলৈ অহা, মৃত গাহৰি বিক্ৰী সম্পূৰ্ণৰূপে নিষিদ্ধ কৰিছে ।
ইয়াৰোপৰি মৃত গাহৰি পেলাই দিয়াৰ পৰিৱৰ্ত্তে জৈৱিক সুৰক্ষা পদ্ধতি অৱলম্বন কৰি গভীৰ গাঁত খান্দিহে পুটিবলৈ নিৰ্দেশত উল্লেখ কৰিছে । মৃত গাহৰি সমূহ মুকলি ঠাইত তথা নদী বা নদীৰ দাঁতিত পেলোৱা সম্পূৰ্ণৰূপে বন্ধ কৰিছে । লগতে গাহৰিৰ খাদ্য ইখন ফাৰ্মৰ পৰা সিখন ফাৰ্মলৈ সৰবৰাহ তথা বিতৰণ কৰাও সম্পূৰ্ণৰূপে নিষিদ্ধ কৰিছে । এই ক্ষেত্ৰত গাহৰি পালক সকলে তেওঁলোকৰ নিজৰ ফাৰ্মৰ বাবে গাহৰিৰ খাদ্য তথা দানা আদি নিৰ্দিষ্ট দোকান আৰু অনুমোদিত ব্যৱসায়িক প্ৰতিষ্ঠানৰ পৰাহে ক্ৰয় কৰিব পাৰিব ।
যদিহে কোনো গাহৰিৰ অধিক জ্বৰ তথা যিকোনো অসাধাৰণ কাৰণত মৃত্যু প্ৰত্যক্ষ কৰে তেনে ক্ষেত্ৰত গৰাকীয়ে অনতিপলমে জিলা পশু চিকিৎসালয় বা স্থানীয় প্ৰশাসনক অৱগত কৰিবলৈ নিৰ্দেশনাটোত পৰামৰ্শ দিয়া হৈছে । তাৰোপৰি সংশ্লিষ্ট বিভাগক ফাৰ্ম সমূহ পৰ্যবেক্ষণৰ লগতে জৈৱিক সুৰক্ষা সন্দৰ্ভত নিয়মীয়াভাৱে পৰিস্কাৰ কৰিবলৈ নিৰ্দেশনাটোত উল্লেখ কৰা হৈছে ।
ৰাজহুৱা শান্তি শৃংখলা তথা গাহৰিৰ ৰোগ প্ৰতিৰোধ অটুত ৰখাৰ স্বাৰ্থত তৎকালীন ভাৱে জাৰি কৰা এই নিষেধাজ্ঞা সমগ্ৰ জিলাখনত পুনৰ আদেশ নিদিয়া পৰ্যন্ত বাহাল থাকিব বুলি উল্লেখ কৰা হৈছে নিৰ্দেশনাটোত । কোনো লোকে এই আদেশ অমান্য কৰিলে ভাৰতীয় ফৌজদাৰী আইনৰ ১৮৮ ধাৰাৰ অধীনত কঠোৰ শাস্তি প্ৰদান কৰা হ’ব বুলিও কঠোৰ সকীয়নি দিলে জিলা প্ৰশাসনে ।
