এসময়ৰ অসমৰ সৰ্ববৃহৎ দীঘল কাঠৰ দলঙখন এতিয়া সেই ঠাইত নাই

অঞ্চলটোৰ মিছমাৰী,বাঁহবেৰা,কলাকুছি আৰু এৰাবাৰী এলেকাত বেলশিৰি নৈৰ ওপৰত নাই এখনো দলং। নৈৰ বুকু ফালি প্ৰতিদিনে ভয়ংকৰ যাতায়াত অঞ্চলবাসীৰ।

ঢেকিয়াজুলি,২ জুলাই: যুগ যুগ ধৰি যাতায়াতৰ ক্ষেত্ৰত চৰম বঞ্চনাৰ সন্মুখীন হৈ আহিছে ঢেকিয়াজুলিৰ সমষ্টিৰ এটা বৃহৎঅঞ্চল ৷ বেলশিৰি নৈৰ ওপৰত এখনো দলং নাই সমষ্টিটোৰ মিছমাৰী,বাঁহবেৰা,কলাকুছি,এৰাবাৰী আৰু খুটাপুটা অঞ্চলত ৷ উল্লেখযোগ্য যে এসময়ত ইয়াতেই আছিল অসমৰ সৰ্ববৃহৎ দীঘল কাঠৰ দলং পাছলৈ বেলশিৰি নৈৰ বাঢ়নী পানীত নিঃচিহ্ন হৈছিল দলঙখন ৷

তেতিয়াৰ পৰাই এখন দলংৰ অভাৱত যমৰ যাতনা ভুগি আহিছে এই অঞ্চলৰ ৰাইজে ৷ ৰাইজে নিজৰ গাঠিৰ ধন ভাঙি বাৰিষাৰ পূৰ্বে নিৰ্মাণ কৰে বাঁহৰ দলং আৰু সেই দলেঙেৰে প্ৰতিদিনে বিপদসংকুলভাবে যাতায়াত অব্যাহত ৰাখিছে অঞ্চলটোৰ ছাত্ৰ-ছাত্ৰীসকলে যাৰ ফলত পৰীক্ষাৰ সময়তো ছাত্ৰ- ছাত্ৰীসকলে উপস্থিত হ'ব নোৱাৰে বিদ্যালয়ত ৷ এই বিষয়ে বহুবাৰ অভিযোগ দিয়াৰ পাছতো স্থানীয় বিধায়কজনে তেওঁলোকৰ সমস্যাৰ কথা গুৰুত্ব নিদিয়া বুলি ৰাইজে ক্ষোভ প্ৰকাশ কৰে ৷