তেজপুৰ, ২২ ডিচেম্বৰ : বিজপিক ভোট নিদিয়া লোকে চৰকাৰৰ যিকোনো আঁচনিৰ বিষয়ে আনতকৈ আগতে জানে । কিন্তু মোদীক ভোট দিয়া মানুহে নাজানে ৷ বৰপেটা জিলাত মানুহে শাৰী পাতি চৰকাৰী আঁচনি গ্ৰহণ কৰে আৰু কিন্তু তেজপুৰত চৰকাৰী আঁচনিৰ লাভ কৰিবলৈ মানুহ বিচাৰি আনিব লাগে ৷ ইয়াৰ মূলতে হৈছে সজাগতা ৷ শুকুৰবাৰে তেজপুৰত এনেদৰে কয় মুখ্যমন্ত্ৰী হিমন্ত বিশ্ব শৰ্মাই ।
শুকুৰবাৰে তেজপুৰৰ ঊষাপুৰ গাঁও পঞ্চায়ত আৰু গাভৰু উন্নয়ন খণ্ডৰ অধীনত অনুষ্ঠিত হোৱা বিকশিত ভাৰত সংকল্প যাত্ৰাত অংশগ্ৰহণ কৰে মুখ্যমন্ত্ৰী ড৹ হিমন্ত বিশ্ব শৰ্মাই । মুখ্যমন্ত্ৰীগৰাকীয়ে কয় যে, প্ৰধানমন্ত্ৰী নৰেন্দ্ৰ মোদীৰ পৰিকল্পনা মতে সমগ্ৰ দেশৰ ২ লাখ ৬০ হাজাৰ গাঁৱত অহা ২৫ জানুৱাৰীৰ ভিতৰত বিকশিত ভাৰত সংকল্প যাত্ৰা সম্পন্ন কৰাৰ লক্ষ্য নিৰ্ধাৰণ কৰা হৈছে ।
ইয়াৰ ভিতৰত ৪ হাজাৰ পৌৰ নিগম নিকায় আছে আৰু সমগ্ৰ দেশতে ৬৮ হাজাৰ গাঁও অন্তৰ্ভুক্ত কৰা হৈছে । শোণিতপুৰ জিলাত মুঠ ৫৮ খন পঞ্চায়তৰ ভিতৰত ৬৬ হাজাৰগৰাকী মহিলা আৰু পুৰুষে উজলাকে ধৰি বিভিন্ন আঁচনি গ্ৰহণ কৰিবলৈ সক্ষম হৈছে । শোণিতপুৰত ৩৫ হাজাৰৰো অধিক লোকে স্বাস্থ্য শিৱিৰৰ আঁচনি আৰু ৩৬ হাজাৰৰ অধিক লোকে যক্ষ্মা ৰোগৰ চিকিৎসা লাভ কৰিবলৈ সক্ষম হৈছে বুলি কয় মুখ্যমন্ত্ৰীগৰাকীয়ে ।
মুখ্যমন্ত্ৰী ড৹ শৰ্মাই ইয়াৰোপৰি কয় যে চৰকাৰে বিকশিত ভাৰত সংকল্প যাত্ৰাৰ অধীনত জনসাধাৰণৰ প্ৰতি সহায়ৰ হাত আগবঢ়াই আহিছে ৷ আনহাতে তেওঁ সাংবাদিকৰ পেন্সন বন্ধ কৰাৰ সন্দৰ্ভতো মন্তব্য প্ৰকাশ কৰে ৷ মুখ্যমন্ত্ৰীগৰাকীয়ে কয় যে সাংবাদিকসকলে পেন্সন লাভ কৰিলে নিজকে হিতাধিকাৰী বুলি ক’ব বুলি ভাবিহে তেওঁ সেই ব্যৱস্থা কৰা নাছিল ৷ ‘হিতাধিকাৰী’ শব্দটোৰ জৰিয়তে সংবাদকৰ্মীসকলক কটাক্ষ কৰি যদিহে হিতাধিকাৰী বুলি নাভাৱে তেন্তে সাংবাদিকসকলৰ বাবেও পেন্সনৰ ব্যৱস্থা কৰা হ’ব বুলি সুৰত সুৰ মিলাই মন্তব্য কৰে মুখ্যমন্ত্ৰীগৰাকীয়ে ৷
লগতে পঢ়ক: হাগ্ৰামাৰ কাষলৈ ঢাপলি মেলিলে বড়োভূমিৰ দুই সহস্ৰাধিক শিক্ষাৰ্থী
