তেজপুৰ, ৭ জুলাই : মাতৃৰ গৰ্ভৰ পৰা ওলাই পৃথিৱীৰ পোহৰ দেখিছেহে মাত্ৰ । ভালকৈ দুচকু মেলাই নাই শিশুটিয়ে । মাতৃৰ বুকুৰ উমলৈ নির্ভয়ে শুই থকা শিশুটি আক্ৰান্ত হৈছে ক’ৰণাত । জন্মৰ মাত্ৰ ৪৮ ঘণ্টাৰ পিছতে দেৱশিশুটি আক্ৰান্ত হৈছে কাল ক’ৰণাত । এই ঘটনাটো সংঘটিত হৈছে তেজপুৰত । শোণিতপুৰ জিলাত দিনক দিনে ক’ভিড-19ৰ দ্বিতীয়টো লহৰৰ সংক্ৰমণৰ সংখ্যা বৃদ্ধি পোৱাৰ সময়তে এটি নৱজাতকৰ দেহত ক’ভিডৰ অৱস্থিতি ধৰা পৰা ঘটনাই চিন্তিত কৰি তুলিছে ৰাইজক ।
জানিব পৰ মতে, তেজপুৰ চহৰৰ কনকলতা অসামৰিক চিকিৎসালয়ত জন্ম হোৱাৰ মাত্ৰ ৪৮ ঘন্টাৰ পিছতে এটি নৱজাতকৰ দেহত ক’ভিডৰ অৱস্থতি ধৰা পৰাত শিশুটিক তেজপুৰৰ পৰোৱা ক’ভিড চিকিৎসালয়ত ভৰ্তি কৰোৱা হয় ৷ তৰাপাচতে চিকিৎসকে পৰোৱা ক’ভিড চিকিৎসালয়ত মাত্ৰ দুঘন্টা চিকিৎসা প্ৰদান কৰি শিশুটিক তেজপুৰ চিকিৎসা মহাবিদ্যালয় হাস্পতাললৈ প্ৰেৰণ কৰে ।
বৰ্তমান তেজপুৰ চিকিৎসা মহাবিদ্যালয় হাস্পতাল সুস্থ অৱস্থাত শিশুটিক চিকিৎসা প্ৰদান কৰি থকা হৈছে বুলি চিকিৎসা মহাবিদ্যালয় কৰ্তৃপক্ষই জানিব দিছে ৷
উল্লেখযোগ্য যে, শিশুটিৰ পিতৃ-মাতৃ তেজপুৰৰ সমীপৱৰ্তী নপাম অঞ্চলৰ । মনকৰিবলগীয়া যে, তেজপুৰ পৰোৱা ক’ভিড চিকিৎসালয়ত আজি পৰ্যন্ত ১৮ বছৰৰ তলৰ ৬৯ টাকৈ শিশু আৰু কিশোৰ ক’ভিড-19ত আক্ৰান্ত হৈ চিকিৎসাধীন হৈ আছে বুলি জানিব পৰা গৈছে ।
উল্লেখযোগ্য যে, বৰপেটা চিকিৎসা মহাবিদ্যালয়তো সংঘটিত হৈছে চাঞ্চল্যকৰ ঘটনা ৷ বৰপেটা মেডিকেল কলেজৰ (Fakhruddin Ali Ahmed Medical College and Hospital, Barpeta)14 গৰাকী কৰ্মচাৰীৰ দেহত পোৱা গৈছে ক'ভিডৰ উপস্থিতি ৷ বিগত কেইটামান দিনৰ ভিতৰতে বৰপেটা মেডিকেল কলেজত কৰ্মৰত এজনৰ পিচত আনজন কৰ্মচাৰী ক'ভিডত আক্ৰান্ত হৈছে ৷
যোৱা ২৬ জুনৰ পৰা 7 জুলাই পৰ্যন্ত বৰপেটা মেডিকেল কলেজৰ ১৪ গৰাকী কৰ্মচাৰীৰ দেহত ধৰা পৰিছে ক'ভিড ৷ বৰপেটা মেডিকেল কলেজৰ এজনৰ পিচত আনজন কৰ্মচাৰী ক'ভিডত আক্ৰান্ত হোৱাক কেন্দ্ৰ কৰি কৰ্মচাৰীসকলৰ মাজত এতিয়া আতংকই বিৰাজ কৰিছে ৷ বিশেষকৈ বৰপেটা মেডিকেল কলেজৰ প্ৰশাসনীয় কাৰ্যালয়ত কৰ্মৰত আছিল ২৫ গৰাকী কৰ্মচাৰী ৷
লগতে পঢ়কঃ IP আধাৰিত CCTV ৰ নিৰীক্ষণত উত্তৰ-পূৱৰ 47 টা ৰে'লৱে ষ্টেচন
