তেজপুৰ,18 জুলাই: সোমবাৰে বুঢ়া চাপৰিৰ চিতলমাৰীত হোৱা বনকৰ্মীৰ গুলীচালনা ঘটনাৰ সন্দৰ্ভত প্ৰতিক্ৰিয়া অব্যাহত আছে ৷ মঙলবাৰে চিতলমাৰীত উপস্থিত হ’ল শোণিতপুৰ জিলাৰ প্ৰশাসন ৷ জিলা আয়ুক্ত দেৱ কুমাৰ মিশ্ৰই সংৰক্ষিত বনাঞ্চলৰ চিতলমাৰী অঞ্চল পৰিদৰ্শন কৰে ।
উল্লেখযোগ্য যে সোমবাৰে বনকৰ্মীৰ গুলীচালনাত এগৰাকী বেদখলকাৰী মহিলা ফাতেমা খাতুনৰ মৃত্যু হয় আৰু আজি মহিলাগৰাকীৰ মৰণোত্তৰ পৰীক্ষা কৰি পৰিয়ালক গতাই দিয়া হ’ব মৃতদেহ । আনহাতে জিলা আয়ুক্ত মিশ্ৰই জনোৱা মতে বুঢ়া চাপৰি বন্য প্ৰাণী সংৰক্ষণ এলেকাৰ চিতলমাৰী শিবিৰত ছমাহ পূৰ্বে উচ্ছেদ হোৱা স্থানত বেদখলকাৰীৰ এটা দলে চোকা অস্ত্ৰৰে আক্ৰমণ কৰিছিল বনকৰ্মীক ৷ এই ঘটনাত বেদখলকাৰীৰ আক্রমণত এগৰাকী বন প্ৰাধিকাৰীৰ লগতে আন তিনিগৰাকী বনকৰ্মী গুৰুতৰ ভাবে আহত হয় ৷
ইফালে বেদখলকাৰীয়ে বন বিভাগৰ চিতলমাৰী কেম্পটো ধ্বংস কৰে আৰু সেই স্থানত নতুনকৈ পুনৰ দখল কৰি অস্থায়ী ঘৰ নিৰ্মাণ কৰিছিল বেদখলকাৰীয়ে । সোমবাৰে বেদখলকাৰীয়ে বন বিভাগৰ কেম্পত ভিতৰত সোমাই দুৱাৰ খিৰিকী ভঙাৰ লগতে কেম্পটো ধ্বংস কৰে বুলি জানিবলৈ দিয়ে । উল্লেখ্য যে এই ঘটনাত আহত হয় বুঢ়া চাপৰি সংৰক্ষিত বনাঞ্চলৰ বন প্ৰাধিকাৰী( DFO)জয়ন্ত ডেকা, ফৰেষ্ট গাৰ্ড আব্দুল আহাদ, গৃহৰক্ষী জোৱান জ্যোতিপ্ৰসাদ দাস আৰু অৰুণ শইকীয়া ৷ আহত বনকৰ্মীসল বৰ্তমানেও চিকিৎসাধীন হৈ আছে ৷
সোমবাৰে বনকৰ্মীৰ গুলীচালনাক নিন্দ প্ৰকাশৰ লগতে CBI তদন্তৰ দাবী কৰিছিল বিধায়ক নুৰুল হুদাই৷ দল সংগঠনেও বন বিভাগক জগৰীয়া কৰি সমগ্ৰ ঘটনা মুখ্যমন্ত্ৰীক হস্তক্ষেপ কৰিবলৈ আহ্বান জনাইছে ৷ প্ৰকৃততে জগৰীয়া কোন, বন বিভাগ নে বেদখলকাৰী ! সেয়া তদন্তত পোহৰলৈ আহিব ৷
লগতে পঢ়ক:Bura Chapori Firing Incident: উচ্ছেদিত লোকৰ আক্ৰমণত আহত 4 বনকৰ্মী
