বৰছলাত ভয়ংকৰ গৰাখহনীয়াৰ কৱলত বিদ্যালয়

বৰছলাৰ মুজামিল হক প্ৰাথমিক বিদ্যালয়খনৰ সন্মুখতে থকা পথটো আধা অংশ চিগি নিয়াত বিপদ সংকুল যাতায়ত কৰিব লগা হৈছে ছাত্ৰ-ছাত্ৰীৰ লগতে স্থানীয় ৰাইজে । এই সন্দৰ্ভত ৰাইজে স্থানীয় বিধায়কজনক বাৰম্বাৰ পথটো মেৰামতিৰ বাবে আবেদন জনোৱাৰ পাছতো কোনো ব্যৱস্থা নোলোৱাৰ অভিযোগ উঠিছে ।

শোণিতপুৰ, ১৯ জুনঃ শোণিতপুৰৰ ২ নং ৰঙাগড়াত বেলশিৰি নৈৰ গৰাখহনীয়াৰ কৱলত বিদ্যালয় । শংকিত স্কুলীয়া ছাত্ৰ -ছাত্ৰীৰ অভিভাৱকৰ লগতে স্থানীয় ৰাইজ ।

বৰছলা বিধানসভা সমষ্টিৰ ২ নং ৰঙাগড়াত বেলশিৰি নৈৰ গৰাখহনীয়াই ধাৰণ কৰিছে ভয়ংকৰ ৰূপ । মুজামিল হক প্ৰাথমিক বিদ্যালয়খনৰ সন্মুখতে থকা পথটো আধা অংশ নৈয়ে চিঙি নিয়াত বিপদ সংকুল যাতায়াত কৰিব লগা হৈছে ছাত্ৰ-ছাত্ৰীৰ লগতে স্থানীয় ৰাইজে । এই সন্দৰ্ভত ৰাইজে স্থানীয় বিধায়কজনক পথটো মেৰামতিৰ বাবে বাৰম্বাৰ অনুৰোধ জনোৱাৰ পাছতো কোনো ব্যৱস্থা নোলোৱাৰ অভিযোগ উঠিছে ।

উল্লেখ্য যে, ইতিপূৰ্বে বিদ্যালয়খনৰ দুগৰাকী শিক্ষাৰ্থী নৈ খনত পৰি গৈছিল । যাৰ বাবে এতিয়া বিদ্যালয়খনৰ মূল প্ৰৱেশ পথৰ চাৰিওকাষে বাঁহৰ বেৰ দি ৰাখিছে স্থানীয় ৰাইজে । এতিয়া প্ৰশ্ন হৈছে,শিক্ষাবিভাগ তথা চৰকাৰে কিয় কণ কণ শিক্ষাৰ্থীসকলৰ জীৱনকলৈ হেতালি খেলে? কিয় গুৰুত্ব নিদিয়ে এনে সমস্যাৰ প্ৰতি ? তদুপৰি ৰাজ্যৰ বিয়াগোম জলসম্পদ বিভাগৰো এই ক্ষেত্ৰত কোনো গুৰুত্ব নোলোৱাত ক্ষুব্ধ হৈ পৰিছে স্থানীয় ৰাইজৰ লগতে বিভিন্ন দল সংগঠন । অতি শীঘ্ৰে উক্ত পথটো মেৰামতি কৰি ছাত্ৰ-ছাত্ৰীৰ লগতে স্থানীয় ৰাইজৰ যাতায়াত বাবে সুবিধা কৰি দিবলৈ চৰকাৰ তথা প্ৰশাসনক দাবী তুলিছে ।

লগতে আন এটা বাতৰি - কোন দিশে অসম শিক্ষা ব্যৱস্থা ?