তেজপুৰ, ৬ নৱেম্বৰ : বদৰুদ্দিন আজমল আৰু বিতৰ্ক, এটা মুদ্ৰাৰে যেন ইপিঠি আৰু সিপিঠি । শেহতীয়াভাৱে বদৰুদ্দিন আজমলৰ আন এটা মন্তব্যৰ বাবে ৰাজ্যৰ ৰাজনীতিত তীব্ৰ বিতৰ্কৰ সৃষ্টি হৈছে । যাৰ বাবে বিৰোধী দল বিশেষকৈ বিজেপিয়ে বদৰুদ্দিন আজমলক তীব্ৰ আক্ৰমণৰ লক্ষ্য কৰি লৈছে ।
আনহাতে, আজমলৰ দল এআইইউডিএফৰ লগত কংগ্ৰেছৰ সম্পৰ্কৰ কথা উল্লেখ কৰি এই বিতৰ্কত কংগ্ৰেছকো টানি আনিছে বিজেপিয়ে । ইয়াৰ বিপৰীতে কংগ্ৰেছেও আজমল-বিজেপিৰ সম্পৰ্কক লৈ প্ৰত্যাক্ৰমণ কৰিছে । ইয়াৰ মাজতে বদৰুদ্দিন আজমলক লৈ এইবাৰ প্ৰশ্ন নিক্ষেপ ঢেকীয়াজুলিৰ বিধায়ক তথা অসম চৰকাৰৰ মন্ত্ৰী অশোক সিংহলৰ ।
এইবাৰ অসম চৰকাৰৰ গৃহ নিৰ্মাণ আৰু জলসিঞ্চন বিভাগৰ মন্ত্ৰী অশোক সিংহলৰ প্ৰশ্ন, "হু ইজ বদৰুদ্দিন আজমল ?" তেজপুৰত আজমলক লৈ সোধা এক প্ৰশ্নৰ উত্তৰত অশোক সিংহলে ওলোটাই এই প্ৰশ্ন কৰে । উল্লেখ্য যে বদৰুদ্দিন আজমলৰ শেহতীয়া মন্তব্যৰ পিছতেই সৰ্বত্ৰে তীব্ৰ প্ৰতিক্ৰিয়াৰ সৃষ্টি কৰিছে ।
আনহাতে, বদৰুদ্দিন আজমলৰ এই মন্তব্যৰ বাবে তেওঁক গ্ৰেপ্তাৰ কৰিব লাগে নেকি বুলি সোধা এক প্ৰশ্নৰ উত্তৰত মন্ত্ৰীগৰাকীয়ে কয় যে গ্ৰেপ্তাৰ কৰিব নালাগে, আজমলক ৰাজনৈতিকভাৱে ধ্বংস কৰিব লাগে । মন্ত্ৰী সিংহলে কয় যে অসমৰ মানুহে এতিয়া আজমলৰ বিৰুদ্ধে উঠিপৰি লাগিব লাগে । কাৰণ 'পথাৰ আমাৰ আৰু বজাৰ আমাৰ' আৰু সেয়া আমাৰ দখলত ৰাখিব লাগে ।
আনহাতে, বদৰুদ্দিন আজমল বিজেপিৰ ট্ৰাম কাৰ্ড নেকি বুলি সোধা প্ৰশ্নৰ উত্তৰত অশোক সিংহলে মন্তব্য কৰে যে আজমলে মাত্ৰ এখন আসনতে হুলস্থুল লগাই আছে । তেওঁ লগতে মন্তব্য কৰে যে অসমৰ উন্নয়ন সাধন কৰিবলৈ সকলোৱে মিলি উৎপাদনৰ ক্ষেত্ৰত আগবাঢ়ি যাব লাগিব । ইয়াৰ দ্বাৰা আগন্তুক সময়ছোৱাত নিজকে অধিক উন্নয়নৰ পথত আগবঢ়াই নিব পাৰিব বুলিও তেওঁ মন্তব্য কৰে ।
উল্লেখ্য যে সোমবাৰে বিয়লি শোণিতপুৰ জিলা আয়ুক্তৰ কাৰ্যালয়ত অনুষ্ঠিত বসুন্ধৰা ২.০-ৰ এক বৈঠকত অংশগ্ৰহণ কৰি জিলাখনৰ ভূমি আৱণ্টনৰ সিদ্ধান্ত গ্ৰহণ কৰে ।
লগতে পঢ়ক :Nameri National Park : পৰ্যটকৰ বাবে আনুষ্ঠানিকভাৱে মুকলি হ’ল নামেৰী ৰাষ্ট্ৰীয় উদ্যান
