ৰঙাপৰা, 04 জুন : শোণিতপুৰ জিলাৰ ৰঙাপৰাত মঙলবাৰে এক পথ দুৰ্ঘটনা সংঘটিত হয় ৷ পথৰ দাঁতিত এখন সেনাৰ গাড়ী বাগৰি পৰাৰ ফলত দুজন সেনাৰ জোৱান থিতাতে নিহত হোৱাৰ লগতে গাড়ীখনৰ চালকজন গুৰুতৰ ভাৱে আহত হয় ৷
ঘটনাৰ বিৱৰণী অনুসৰি পুৱা প্ৰায় 6.10 বজাত ৰঙাপৰাৰ ফুলবাৰীত থকা ভাৰতীয় সেনা বাহিনীৰ 'জেক' ৰেজিমেণ্টৰ এখন গাড়ী ৰঙাপৰা-বালিপৰা সংযোগী গড়কাপ্তানী পথচোৱাৰে ৰঙাপৰা অভিমুখে গৈ আছিল ৷ তেনে সময়তে নেকেৰাহোলাত গাড়ীখনে নিয়ন্ত্ৰণ হেৰুৱাই পথৰ দাঁতিত বাগৰি পৰে ৷ উক্ত পথ দুৰ্ঘটনাটোত গাড়ীখনৰ পিচফালে বহি থকা দুজন ভাৰতীয় সেনা জোৱান থিতাতে নিহত হয় ৷ ইপিনে গাড়ীখনত থকা চালকজন গুৰুতৰভাৱে আঘাতপ্ৰাপ্ত হয় যদিও কথমপি প্ৰাণ ৰক্ষা পৰে চালকজনৰ ৷ আনহাতে ঘটনাটোৰ খবৰ পোৱাৰ মাত্ৰকে সেনাৰ শীৰ্ষ বিষয়াসকল ঘটনাস্থলীত উপস্থিত হৈ ঘটনাৰ বুজ লোৱাৰ লগতে মৃতদেহ দুটা আৰু আহত চালকজনক উদ্ধাৰ কৰে ৷ অৱশ্যে সেনাৰ শীৰ্ষ বিষয়াই, দুঘৰ্টনাটোত নিহত জোৱান দুগৰাকীৰ নাম প্ৰকাশ কৰা নাই ৷ বিশেষ সূত্ৰে জানিব পৰা মতে মৃত সেনাৰ জোৱান দুজনে চৰকাৰী ভাৱে লাভ কৰা ছুটী লৈ নিজা গৃহ অভিমুখে যোৱাৰ উদ্দেশ্যৰে ৰঙাপৰা ৰেলেৱে ষ্টেচনলৈ সেনাৰ গাড়ীখনত গৈ আছিল ৷ ইপিনে দুৰ্ঘটনা সংঘটিত হোৱাৰ ফলত ৰঙাপৰা-বালিপৰা গড়কাপ্তানী পথছোৱাত বহু সময় ধৰি যান-বাহন চলাচল ব্যাহত হৈ পৰে ৷
