তেজপুৰ,4 নৱেম্বৰঃ তেজপুৰৰ পৰা নাট শিল্প ক্ষেত্ৰখনৰ লগত সুদীৰ্ঘ কাল জড়িত থাকি ৰাষ্ট্ৰীয় আৰু আন্তঃ ৰাষ্ট্ৰীয় পৰ্যায়ত নাটকৰ জৰিয়তে কৃতিত্বৰ পৰিচয় দিবলৈ সক্ষম হোৱা বিশিষ্ট নাট্যকাৰ পৰিচালক ঐশ্বৰ্য্য কাকতিৰ ৭৬ সংখ্যক ওপজা দিনত ৰাইজলৈ চতুৰ্থ বাৰৰ বাবে উপহাৰ দিয়া মননশীল নাটক ' সন্ধিয়া আহিল কোন বাটে', আনুষ্ঠানিক ভাৱে মুকলি কৰে এসময়ৰ বিখ্যাত কার্টুনিষ্ট তথা বিষ্ণু ৰাভা বঁটা প্ৰাপক পুলক গগৈয়ে ৷ নাটক খনত অভিনয় কৰে বিশিষ্ট অভিনেতা অৰুণ নাথ, অভিনেত্ৰী কৃষ্ণা দাস নাথে ।
শোণিতপুৰ জাৰনেলিষ্ট ইউনিয়ন আৰু ইউনাইটেড আৰ্টিষ্ট ফাউণ্ডেশ্যনৰ সৌজন্যত অনুষ্ঠিত এই নাট্য অনুষ্ঠানত ঐশ্বৰ্য্য কাকতি আৰু সাংবাদিক তথা সংগীত শিল্পী গৌতম শৰ্মাক সম্বৰ্ধনা জনোৱা হয় । এই নাট মুকলি কৰি ৰাজ্যৰ বিশিষ্ট চিত্ৰ শিল্পী, চলচ্চিত্ৰ প্ৰযোজক পুলক গগৈয়ে কয় যে ,"কলা-সংস্কৃতিক পেছা হিচাপে লৈ জীৱন নিৰ্বাহ কৰা পূৰ্বেও কঠিন আছিল আৰু এতিয়াও সহজ নহয়।"
