শিৱসাগৰ,25 মাৰ্চ: ন ন প্ৰতিশ্ৰুতি আৰু ব্যাপক প্ৰচাৰৰ অন্তত বৃহস্পতিবাৰে বিয়লি 5 বজাত অন্ত পৰিব নিৰ্বাচনী প্ৰচাৰ ৷ নিৰ্বাচনী প্ৰচাৰৰ শেষৰটো দিনৰ প্ৰচাৰৰ পূৰ্বে শিৱসাগৰৰ শিৱদ'লত উপস্থিত হৈ সেৱা ল’লে শিৱসাগৰ বিধানসভা সমষ্টিৰ কংগ্ৰেছ দলৰ প্ৰাৰ্থী শুভ্ৰমিত্ৰ গগৈয়ে ৷ প্ৰচাৰৰ পূৰ্বে এইবাৰৰ নিৰ্বাচনত তেওঁৰ জয় নিশ্চিত বুলি সংবাদ মাধ্যমৰ আগত প্ৰকাশ কৰি যুৱ প্ৰাৰ্থী গৰাকীয়ে মন্তব্য কৰে যে, শিৱসাগৰৰ ৰাইজ কংগ্ৰেছ দলৰ লগত আছে ৷ বিজেপি দলৰ পৰিৱৰ্তনৰ শাসন ইতিমধ্যে ৰাইজে দেখিছে ৷ এই পাঁচটা বছৰত বিজেপি চৰকাৰৰ ভাগ ভাগ ৰাজনীতিয়ে ৰাইজক অতিষ্ঠ কৰিছে ৷ যাৰ বাবে এতিয়া ৰাইজৰ হাতত কেৱল এটাই বিকল্প আছে, আৰু সেয়া হৈছে কংগ্ৰেছ ৷
উল্লেখ্য যে, ইতিমধ্যে নিৰ্বাচনত বিজেপি প্ৰাৰ্থী পৰাজিত হোৱাটো নিশ্চিত বুলি জানি বিজেপিয়ে হকে-বিহকে কংগ্ৰেছৰ সমালোচনাত ব্যস্ত হৈ পৰিছে বুলিও মন্তব্য কৰে শুভ্ৰমিত্ৰ গগৈয়ে ৷ এতিয়া ৰাইজে অসমত এক পৰিকল্পিত উন্নয়ন আৰু শান্তিৰ বাতাবৰণ বিচাৰিছে বুলি মন্তব্য কৰি এইবাৰ ৰাইজে কংগ্ৰছ দলক ভোট প্ৰদান কৰিব বুলি মন্তব্য কৰে প্ৰাৰ্থী গৰাকীয়ে ৷
লগতে পঢ়কঃ জনীয়াত খেলা আৰু মেলা নহয়, যুদ্ধ হ'ব : আব্দুল জলিল তালুকদাৰ
