শিৱসাগৰ, 16 জুন : দীৰ্ঘদিনৰ পৰা শয্যাশায়ী হৈ আছে শিৱসাগৰৰ হাঁহচৰাৰ মৈৰামাৰী বোকাপানী গাঁৱৰ এগৰাকী যুৱতী ৷ এক অচিন ৰোগত আক্ৰান্ত হৈ নিজ ঘৰতে শয্যাশায়ী হৈ আছে ৰিতুমণি হাজৰিকা নামৰ 23 বছৰীয়া মেধাৱী যুৱতীগৰাকী ৷ দৰিদ্ৰ পৰিয়ালৰ ৰিতুমণিয়ে 2019 বৰ্ষত নাজিৰা মহাবিদ্যালয়ৰ পৰা সমাজতত্ব বিষয়ত স্নাতক ডিগ্ৰী লাভ কৰিছিল ৷
ৰিতুমণিক আৰ্থিক সহায়ৰ প্ৰয়োজন
দেহত এটাৰ পাচত আন এটা বেমাৰে থিতাপি লোৱাৰ বাবে বস্ত্ৰ পৰিধান কৰাতো অসুবিধাৰ সন্মুখীন হৈছে ৰিতুমণিয়ে । সামান্য এখন কাপোৰেৰে লজ্জা নিবাৰণ কৰি অসহায়ভাৱে মাহৰ পিছত মাহ বিচনাত পৰি আছে অসহায় যুৱতীগৰাকীয়ে । আনহাতে, ৰিতুমণিৰ ঘৰত সাঁচতীয়া বুলিবলৈ এপইচাও নাই ৷
