শিৱসাগৰ, 6 নৱেম্বৰ: 107 নং থাওৰা বিধানসভা সমষ্টিৰ প্ৰাণকেন্দ্ৰ ডিমৌ চাৰিআলিৰ পৰা বৃহত্তৰ বকতা মৌজাৰ খামুন সংযোগী ঐতিহাসিক হাৰিপৰা আলিটো নিৰ্মাণত ব্যাপক বিসংগতি সংঘটিত হোৱা অভিযোগ ৷ বিগত বহুবছৰ ধৰি এই ঐতিহাসিক পথটো বিধ্বস্ত হৈ থকাৰ বাবে যমৰ যাতনা ভুগিবলগীয়া হৈছে দৈনিক অহা যোৱা কৰা প্ৰায় শতাধিক গাঁৱৰ ৰাইজে ৷ ৰাইজৰ বহু আবেদন নিবেদনৰ পাছত ডিমৌ গড়কাপ্তানী উপ-সংমণ্ডল কাৰ্যালয়ৰ অন্তৰ্গত এই বিধ্বস্ত পথটো 2018 চনৰ 3 নৱেম্বৰ তাৰিখে পুনৰ মেৰামতিৰ বাবে বিভাগে SOPD পুঁজিৰ শিতানত অনুমোদন কৰিছিল 51 লাখ 91 হাজাৰ টকা ৷ পথটো নিৰ্মাণৰ কামৰ শুভাৰম্ভ কৰিছিল থাওৰা সমষ্টিৰ বিধায়ক কুশল দুৱৰীয়ে ৷ কিন্তু উক্ত পথটিৰ নিৰ্মাণৰ কাম শুভাৰম্ভ কৰা দুটা বছৰ অতিক্ৰম হল যদিও আজি তাৰিখলৈকে সম্পূৰ্ণ হৈ নুঠিল ৷ যাৰ বাবে,ডিমৌৰ এজন সংবাদকর্মীয়ে তথ্য জনাৰ অধিকাৰ আইনৰ অধীনত আবেদন কৰাত ডিমৌ গড়কাপ্তানী উপ-সংমণ্ডল কাৰ্যালয়ে দিয়া তথ্যত ওলাই পৰিল জুলুঙাৰ মেকুৰী ৷
আৰ টি আইৰ তথ্য অনুসৰি শিৱসাগৰ নগৰৰ সঞ্জীৱ মেথিউছ নামৰ এজন ঠিকাদাৰৰ নামত আবন্টিত হোৱা এই পথটোৰ 80 শতাংশ কাম সম্পূৰ্ণ হ'ল বুলি গড়কাপ্তানী বিভাগৰ কাৰ্যলয়ে জানিবলৈ দিয়ে । কিন্তু ডিমৌ চাৰিআলিৰ পৰা মাত্ৰ 300 মিটাৰ কাম হে সম্পূৰ্ণ কৰিছে ঠিকাদাৰ গৰাকীয়ে ৷ এই দৰে অতি কম কাম কৰি ঠিকাদাৰ গৰাকীয়ে বাকী টকা আত্মসাৎ কৰিলে বুলি সন্দেহ প্ৰকাশ কৰিছে স্থানীয় দল সংগঠনে ৷ ইয়াৰ পাছতে দল সংগঠন আৰু আৰ টি আই কৰ্মীৰ অভিযোগৰ ভিত্তিত ডিমৌৰ ৰাজহ চক্ৰ বিষয়া ইণ্ডিকা গগৈয়ে এসপ্তাহৰ ভিতৰত বাকী অংশ কাম কৰিবলৈ ডিমৌ গড়কাপ্তানী উপ-সংমণ্ডল কাৰ্যালয় বিষয়া সীমান্ত তামূলীক নিৰ্দেশ দিয়ে ৷ ইফালে ডিমৌ সংবাদকর্মী সকলে উপ-সংমণ্ডল কাৰ্যালয় বিষয়া সীমান্ত তামূলীৰ পৰা উক্ত বিষয়ৰ সন্দৰ্ভত জানিব বিচৰাত কোনো ধৰণৰ মন্তব্য প্ৰদান কৰাৰ পৰা বিৰত থাকে ৷
লগতে পঢ়কঃ অসম ৰাজ্যিক চিৰিয়াখানাত মুকলি হ’ল দুস্প্ৰাপ্য প্ৰজাতিৰ মাকাউ আৰু কেংগেৰু
