আমগুৰি, 14 অক্টোবৰ : সুদূৰ ৰাছিয়াৰ পৰা আহিছে ভাইচিলি । দিনে নিশাই এখন নাও তৈয়াৰ কৰাত ব্যস্ত ব্যক্তিজন । উদ্দেশ্য এটাই- শদিয়াৰ পৰা ধুবুৰীলৈকে নাৱেৰে ব্ৰহ্মপুত্ৰ পৰিভ্ৰমণ কৰিব । তেওঁক সংগ দিব ইণ্ডোনেচিয়াৰ আন দুজন নাগৰিকেও ।
ইতিমধ্যে হাতে সজা নাৱেৰে বিশ্বৰ আন কেইবাখনো দেশৰ বিখ্যাত নদীসমূহ পৰিভ্ৰমণ কৰিছে ভাইচিলিয়ে । অসম আৰু অসমীয়াৰ প্ৰশংসাত পঞ্চমুখ হাঁহিমুখীয়া ব্যক্তিজনৰ মুখত । এটা মাহ পূৰ্বে সুদূৰ ৰাছিয়াৰ পৰা ভাৰত ভ্ৰমণ কৰিবলৈ আহি ৰাছিয়ান নাগৰিক ভাইচিলিয়ে শিৱসাগৰ জিলাৰ পশ্চিম প্ৰান্তৰ দিখৌমুখৰ দীঘল-দৰিয়লি গাঁৱত বাহৰ পাতিছিল ।
বিশ্বৰ বিভিন্ন দেশৰ নদীসমূহ নিজ হাতে তৈয়াৰ কৰা নাৱেৰে পৰিভ্ৰমণ কৰি নদীকাষৰীয়া অঞ্চলসমূহৰ মানুহৰ জীৱন ধাৰাৰ বুজ লোৱা ভাইচিলিয়ে গোৱাত লগ পাইছিল এজন শিৱসাগৰৰ ব্যৱসায়ীক । হৰ্ষ নামৰ যুৱকজনৰ মুখত ব্ৰহ্মপুত্ৰ আৰু ইয়াৰ বিশালতাৰ বিষয়ে শুনি আকৰ্ষিত হৈ এটা মাহ পূৰ্বে তেওঁ উপস্থিত হয় শিৱসাগৰ জিলাৰ দিখৌমুখত ।
বৰ্তমান দিখৌমুখ থেকেৰাতলৰ এটা পৰিয়ালত আশ্ৰয় গ্ৰহণ কৰি দীঘলদৰিয়লি গাঁৱত নাও তৈয়াৰত ব্যস্ত ৰাছিয়ান নাগৰিকজন । অসমৰ গাঁও আৰু নামঘৰৰ বিষয়ে প্ৰশংসা কৰা ভাইচিলিয়ে অক্টোবৰ ২০ তাৰিখৰ ভিতৰত নাওখন সম্পূৰ্ণ কৰি দিখৌমুখ ৰূপহীমুখৰ পৰা ব্ৰহ্মপুত্ৰৰে শদিয়ালৈ যাত্ৰা কৰিব । তাৰ পৰাই উভতনি যাত্ৰাৰে ব্ৰহ্মপুত্ৰৰে বাংলাদেশৰ মাজেৰে কন্যাকুমাৰীত উপস্থিত হ’ব ।
নদী কাষৰীয়া মানুহৰ জীৱন অধ্যয়ন বিশ্ব শান্তিৰ বাণী প্ৰচাৰ কৰাই মূল উদ্দেশ্য ভাইচিলিৰ । অনুবাদক সাহিত্যৰ সৈতে জড়িত ভাইচিলিৰ মন গুৰু দুজনাৰ সৃষ্টিক ৰাছিয়ান ভাষালৈ অনুবাদ কৰা । অসমৰ গাঁৱৰ পৰিৱেশ আৰু আতিথ্যৰ প্ৰশংসাত পঞ্চমুখ ৰাছিয়ান নাগৰিকজন ।
দিখৌমুখৰ নামঘৰতো দেখা গৈছে ৰাছিয়ান নাগৰিক ভাইচিলিক । গুৰু দুজনাৰ অমৰ সৃষ্টি নামঘৰত নামৰ অমিয়া সুৰত বিলীন হৈ ভকত-বৈষ্ণৱৰ লগত একতাৰ ডোলেৰে বান্ধ খাইছে । দিখৌমুখৰ প্ৰাকৃতিক সৌন্দৰ্যত বিলীন হোৱা ভাইচিলিৰ আগমনে, দিখৌমুখক অধিক প্ৰাণৱন্ত কৰি তুলিছে ।
