নাজিৰা,২৮ ডিচেম্বৰ : সত্ৰাধিকাৰসকলক সচৰাচৰ সমাজৰ উচ্চ আসনত ৰখা হয় । ৰাজ্যৰ সত্ৰসমূহৰ সত্ৰাধিকাৰসকলক সকলোৱে শ্ৰদ্ধা কৰে । কিন্তু এইবাৰ সত্ৰাধিকাৰৰ সত্ত্বাক কলংকিত কৰিলে নাজিৰাৰ দুৰামাৰি সত্ৰৰ ডেকা সত্ৰাধিকাৰে ! ডেকা সত্ৰাধিকাৰৰ বিৰুদ্ধে উঠিছে হত্যাৰ অভিযোগ । ইতিমধ্যে হত্যাৰ অভিযোগত ৰঙাঘৰৰ আলহীও হ'বলগা হ'ল ডেকা সত্ৰাধিকাৰগৰাকী ।
ঘটনাটো শিৱসাগৰ জিলাৰ নাজিৰাৰ (Nazira murder case)। হত্যাৰ দৰে জঘন্য অপৰাধত লিপ্ত হৈছে এজন সত্ৰাধিকাৰ । কুঠাৰেৰে ঘপিয়াই নিৰ্মমভাৱে ৭০ বছৰীয়া এজন বৃদ্ধক মঙলবাৰে নিশা হত্যা কৰিলে ডেকা সত্ৰাধিকাৰে (Man killed by Satradhikar of Duramari Satra)! নাজিৰা চকীমুখস্থিত দুৰামাৰি সত্ৰৰ ডেকা সত্ৰাধিকাৰ প্ৰাঞ্জল মহন্তৰ বিৰুদ্ধে উঠিছে এই গুৰুতৰ অভিযোগ ।
অভিযোগ অনুসৰি মঙলবাৰে নিশা ডেকা সত্ৰাধিকাৰৰ গৃহত চাকি বন্তি জ্বলোৱাৰ দায়িত্বত নিয়োজিত ৭০ বছৰীয়া বৃদ্ধ জয়নাথ বৰাক হত্যা কৰা হয় । ডেকা সত্ৰাধিকাৰ প্ৰাঞ্জল মহন্তই কুঠাৰেৰে উপৰ্যুপৰি প্ৰহাৰ কৰে জয়নাথ বৰাক । ঘটনা সংঘটিত কৰিয়েই ঘটনাস্থলীৰ পৰা পলায়ন কৰে অভিযুক্ত প্ৰাঞ্জল মহন্ত । ইফালে গোঁসাই থাপনাতে গুৰুত্বৰভাৱে আহত হৈ পৰি থাকে জয়নাথ বৰা ।
নিশা জয়নাথ বৰাক উদ্ধাৰ কৰি স্থানীয় ৰাইজৰ সহযোগত নাজিৰা আৰক্ষীয়ে ততাতৈয়াকৈ চিকিৎসালয়লৈ প্ৰেৰণ কৰে । কিন্তু দুৰ্ভাগ্যজনকভাৱে চিকিৎসালয়ত জয়নাথ বৰাই শেষ নিশ্বাস ত্যাগ কৰে । ইফালে পুৱা নাজিৰা আৰক্ষীয়ে আটক কৰে অভিযুক্ত ডেকা সত্ৰাধিকাৰ প্ৰাঞ্জল মহন্তক (Satradhikar arrested in Nazira)।
সত্ৰৰ ভিতৰত এনে এক জঘন্য ঘটনা সংঘটিত কৰি ধৰ্মীয় অনুষ্ঠানক কলুষিত কৰাক লৈ বিভিন্নজনে তীব্ৰ প্ৰতিক্ৰিয়া প্ৰকাশ কৰিছে ৷ বহুলোকে ডেকা সত্ৰাধিকাৰগৰাকীক কঠোৰ শাস্তিৰো দাবী জনাইছে ।
উল্লেখ্য যে পত্নীৰ সৈতে সত্ৰৰ গৃহত বসবাস কৰা প্ৰাঞ্জল মহন্তৰ সৈতে বহুদিন ধৰি সহায়ক হিচাপে কাম কৰি আছিল জয়নাথ বৰাই ৷ সত্ৰৰ সকলো কাম কাজত সহায় কৰি অহা ৭০ বছৰীয়া বৃদ্ধজনক এনেদৰে হত্যা কৰা ঘটনাই ৰাজ্যজুৰি চাঞ্চল্যৰ সৃষ্টি কৰিছে ৷ জানিব পৰা মতে জয়নাথ বৰাৰ ঘৰ শিৱসাগৰ জিলাৰ বাকচুত ৷ অবিবাহিত লোকজনৰ মৃত্যুৰ পাছতে এতিয়া শোকত ভাগি পৰিছে পৰিয়ালৰ লোকসকল ৷
আনহাতে অভিযুক্ত হত্যাকাৰীক গ্ৰেপ্তাৰ কৰাৰ লগতে নাজিৰা আৰক্ষীয়ে ইতিমধ্যে ঘটনা সন্দৰ্ভত তদন্ত অব্যাহত ৰাখিছে । লগতে মৃত জয়নাথ বৰাৰ মৃতদেহ মৰণোত্তৰ পৰীক্ষাৰ বাবেও জয়সাগৰ অসামৰিক চিকিৎসালয়লৈ প্ৰেৰণ কৰিছে ৷
সমগ্ৰ ঘটনাক লৈ দুৰামাৰি সত্ৰত ৰহস্যৰ সৃষ্টি হৈছে (Sensational murder case in Nazira)। বৰ্তমানলৈকে হত্যাকাণ্ডৰ প্ৰকৃত কাৰণ জানিব পৰা হোৱা নাই যদিও প্ৰাঞ্জল মহন্তই অভিযোগ কৰা মতে মৃত জয়নাথ বৰাই বিভিন্ন সময়ত ডেকা সত্ৰাধিকাৰজনক অপবাদ দি আহিছিল । সত্ৰাধিকাৰে এই অপবাদ সহিব নোৱাৰিয়ে খঙৰ ভমকত কুঠাৰেৰে আক্ৰমণ কৰিছিল ৭০ বছৰীয়া বৰাক ৷ অৱশ্যে আৰক্ষীৰ সঠিক তদন্তৰ অন্তত হে প্ৰকৃত ৰহস্য পোহৰলৈ আহিব ।
লগতে পঢ়ক :Shraddha murder case Update : আফতাবৰ কণ্ঠৰ নমুনা সংগ্ৰহ CBIৰ CFSLৰ দলৰ
