শিৱসাগৰ, 24 অক্টোবৰ : ‘‘বাহিৰে ৰং-চং ভিতৰে কোৱা ভাতুৰি ৷ এই কথাষাৰ প্ৰমাণিত হ’ল বিজেপি দলৰ ক্ষেত্ৰত ৷ কেৱল প্ৰতিশ্ৰুতি দিয়ে বিজেপি চৰকাৰে, কিন্তু সেই প্ৰতিশ্ৰুতি পূৰণত ব্যৰ্থ হৈছে অসম চৰকাৰ’’ ৷ এই বুলি বিজেপি চৰকাৰক কটাক্ষ কৰে বিৰোধী দলপতি দেৱব্ৰত শইকীয়াই ৷
উল্লেখ্য যে, দেওবাৰে শিৱসাগৰত উপস্থিত হয় নিখিল ভাৰত কংগ্ৰেছ সমিতিৰ সম্পাদক তথা অসম প্ৰদেশৰ তত্বাৱধায়ক জিতেন্দ্ৰ সিং ৷ দেওবাৰে থাওৰা বিধানসভা সমষ্টিৰ উপ-নিৰ্বাচনৰ প্ৰস্তুতি পৰ্যৱেক্ষণৰ বাবে শিৱসাগৰত উপস্থিত হয় অসম প্ৰদেশৰ তত্বাৱধায়কগৰাকী । জিলাখনত উপস্থিত হৈয়ে কংগ্ৰেছ নেতাগৰাকীয়ে ঐতিহাসিক শিৱসাগৰৰ শিৱ দৌলত সমগ্ৰ ৰাজ্যৰ মংগলৰ বাবে প্ৰাৰ্থনা সেৱা আগবঢ়াই ।
থাওৰা বিধানসভা সমষ্টিৰ সন্দৰ্ভত কংগ্ৰেছ নেতাগৰাকীয়ে বিজেপি দলটোক তীব্ৰ সমালোচনা কৰে । ৰাজনীতিৰ মূল্যবোধ জলাঞ্জলি দি বিজেপি দলৰ নেতা তথা মুখ্যমন্ত্ৰী হিমন্ত বিশ্ব শৰ্মাই ধনৰ পোহাৰ মেলি বিধায়ক কিনা-বেচাৰ এক মুকলি কু-পৰম্পৰা আৰম্ভ কৰা বুলি নেতাগৰাকীয়ে সমালোচনা কৰে । লগতে তেওঁ কয় যে, এনে ধনৰ ৰাজনীতি কেৱল অসমৰ বাবেই নহয়, সমগ্ৰ দেশৰ বাবে ক্ষতিকাৰক । বৰ্তমান বিজেপি দলে কেৱল বিভেদৰ ৰাজনীতি কৰিছে বুলি তেওঁ ক্ষোভ উজাৰে ।
আনহাতে, কংগ্ৰেছ দলৰ হৈ বিগত নিৰ্বাচনত জয়ী হোৱা থাওৰা সমষ্টিৰ সুশান্ত বৰগোঁহাই আৰু মৰিয়নী সমষ্টিৰ ৰূপজ্যোতি কুৰ্মীয়ে কেৱল কংগ্ৰেছ দলটোক প্ৰতাৰণা কৰিছে এনে নহয়, তেওঁলোকে ৰাইজৰ আস্থাক প্ৰতাৰণা কৰিছে ৷ এই বুলি মন্তব্য কৰে নিখিল ভাৰত কংগ্ৰেছ সমিতিৰ সম্পাদক জিতেন্দ্ৰ সিঙে । আনহাতে, যি সময়ত ৰাজ্যত মূল্যবৃদ্ধিয়ে এক ভয়ংকৰ সমস্যাৰ সৃষ্টি কৰিছে ৷ সেই সময়ত কেৱল নিজৰ লাভৰ বাবে দল সলনি কৰি পুনৰ উপ-নিৰ্বাচনৰ পৰিৱেশ সৃষ্টি কৰা সকলক ৰাইজে ক্ষমা নকৰে বুলিও মন্তব্য কৰে নেতাগৰাকীয়ে ৷
উপ নিৰ্বাচন অনুষ্ঠিত হোৱা সমষ্টি সমূহত ৰাইজে প্ৰতাৰক-সুবিধাবাদী নেতাবোৰক শিক্ষা প্ৰদান কৰিব বুলিও কংগ্ৰেছ দলৰ শীৰ্ষ নেতাগৰাকীয়ে দাবী কৰে । দেওবাৰে সমষ্টি ভ্ৰমণত নেতাগৰাকীক সংগ দিয়ে প্ৰাক্তন সভাপতি ৰিপুন বৰা, সভাপতি ভূপেন বৰা, নাজিৰা সমষ্টিৰ বিধায়ক দেৱব্ৰত শইকীয়াৰ লগতে দলটোৰ কেইবাগৰাকীও নেতা-কৰ্মী ৷
লগতে পঢ়ক : আফগানিস্তানত অসুৰক্ষিত হিন্দু ; ভাৰতত স্থান দিয়াৰ আহ্বান নিৰ্যাতিতৰ
