আমগুৰি, 19 আগষ্ট : শিৱসাগৰ জিলাৰ আমগুৰি সমষ্টিৰ অধীনৰ 37 নং ৰাষ্ট্ৰীয় ঘাইপথৰ দাঁতিত অৱস্থিত জাঁজী হেমনাথ শৰ্মা মহাবিদ্যালয়ৰ(Jhanji Hemnath Sarma College) অধ্যক্ষৰ বিৰুদ্ধে উত্থাপন হৈছে ধন আত্মসাতৰ অভিযোগ ৷ মহাবিদ্যালয়খনৰ অধ্যক্ষ ড৹ মনজিৎ গগৈয়ে নীতি বৰ্হিভূতভাৱে ধন সংগ্ৰহ কৰাৰ অভিযোগ উত্থাপন হৈছে ৷
লগতে পঢ়ক : এগৰাকী প্ৰাক্তন প্ৰধান শিক্ষকৰ বিৰুদ্ধে দুৰ্নীতিৰ অভিযোগ
ক’ভিডৰ(Covid) জটিল পৰিস্থিতিৰ বাবে অনলাইনযোগে মহাবিদ্যালয়ত নামভৰ্তিৰ প্ৰ-পত্ৰ পূৰণ আৰু ছাত্ৰ-ছাত্ৰীৰসকলৰ পৰা মাচুল আদায় নকৰিবলৈ নিৰ্দেশনা জাৰি কৰিছিল ৰাজ্য চৰকাৰে । G(B)/Misc/41/2021/2220 নম্বৰৰ জাননীযোগে বিগত 2 আগষ্টত নিৰ্দেশনা জাৰি কৰিছিল শিক্ষা বিভাগে(Education Department) ।
অভিযোগ অনুসৰি, ৰাজ্য চৰকাৰ তথা শিক্ষা বিভাগৰ এই নিৰ্দেশনা উলংঘা কৰি নতুনকৈ নামভৰ্তি কৰা উচ্চতৰ মাধ্যমিক প্ৰথম বৰ্ষ আৰু স্নাতক প্ৰথম ষান্মাসিকৰ দৰিদ্ৰ সীমাৰেখাৰ ওপৰৰ শিক্ষাৰ্থীসকলৰ পৰা 4000-5000 টকাকৈ মাচুল সংগ্ৰহ কৰিছে অধ্যক্ষগৰাকীয়ে । অধ্যক্ষ গগৈয়ে এই অভিযোগ নস্যাৎ কৰিলেও বহু কেইগৰাকী ছাত্ৰ-ছাত্ৰীয়ে মাচুল সংগ্ৰহ কৰাৰ ৰচিদ প্ৰমাণ হিচাপে সংবাদ মাধ্যমৰ সন্মুখত প্ৰকাশ কৰে ।
আনহাতে, ক’ভিড পৰিস্থিতিৰ বাবে সকলো শিক্ষানুষ্ঠান বৰ্তমানলৈকে বন্ধ ৰখাৰ নিৰ্দেশ বাহাল ৰখা হৈছে ৷ চৰকাৰী নিৰ্দেশনা জাৰি ৰখাৰ মাজতে কেনেদৰে অধ্যক্ষগৰাকীয়ে নামভৰ্তিৰ নামত বিদ্যালয়খনত ভীৰ সৃষ্টি কৰিলে, তাক লৈ প্ৰশ্ন উত্থাপন হৈছে সচেতন মহলৰ মাজত । চৰকাৰ তথা বিভাগীয় কৰ্তৃপক্ষৰ নীতি-নিৰ্দেশনা উলংঘন কৰা এইগৰাকী অধ্যক্ষৰ বিৰুদ্ধে উচিত তদন্তৰ দাবী জনাইছে স্থানীয় ৰাইজে ।
লগতে পঢ়ক : প্ৰথমে আদায় দিলে কৰ, তাৰপিছত ট্ৰাক লৈ পলায়ন
