শীৰ্ষ 10 চুপাৰ চিংগাৰ ৰাউণ্ডত শিৱসাগৰৰ হৰ্ষিত নাথ

শীৰ্ষ 12ৰ পৰা অন্তিম শীৰ্ষ 10 চুপাৰ চিংগাৰ ৰাউণ্ডত প্ৰৱেশ কৰিছে শিৱসাগৰৰ হৰ্ষিত নাথে। মুম্বাইৰ পৰা সুধাকণ্ঠক সোঁৱৰি গীত গুণগুণাই বিচাৰিছে আপোনাৰ আশীৰ্বাদৰ লগতে বিজয়ৰ বাবে বহু মুল্যবান ভোট

শিৱসাগৰ, 14 চেপ্তেম্বৰঃ ৰাষ্ট্ৰীয় পৰ্যায়ত পুনৰ চৰ্চিত অসমৰ শিল্পী ৷ চ'নী টিভিৰ দ্বাৰা সম্প্ৰচাৰিত সংগীতানুষ্ঠান "চুপাৰ ষ্টাৰ চিংগাৰ"ত নিজৰ কণ্ঠেৰে মুহিছে অসমৰ কণমাণি শিল্পী হৰ্ষিত নাথে। যাদুকৰী কণ্ঠৰ অধিকাৰী হৰ্ষিত নাথে নিজৰ কণ্ঠৰে মুহিছে দেশৰ হাজাৰ হাজাৰ শ্ৰোতা দর্শকক । শীৰ্ষ 12ৰ পৰা অন্তিম শীৰ্ষ 10 চুপাৰ চিংগাৰ ৰাউণ্ডত প্ৰৱেশ কৰিছে শিৱসাগৰৰ হৰ্ষিত নাথ। মুম্বাইৰ পৰা সুধাকণ্ঠক সোঁৱৰি গীত গুণগুণাই বিচাৰিছে আপোনাৰ আশীৰ্বাদৰ লগতে বিজয়ৰ বাবে বহু মূল্যবান ভোট। হৰ্ষিতৰ লগতে মাতৃয়েও ভোটৰ বাবে বিভিন্ন শিক্ষানুষ্ঠানলৈ গৈ অনুৰোধ জনাই। হৰ্ষিতক বিজয়ী কৰাৰ বাবে আপোনাৰ মৰম,আশীৰ্বাদ আৰু এটা ভোটৰ প্ৰয়োজন। হৰ্ষিতক প্ৰথম স্থান পাবলৈ এতিয়াৰ পৰা সহায় লাগিব সমগ্ৰ অসমবাসীৰ ৷ এতিয়াৰ পৰা প্ৰতিটো ৰাউণ্ডতে ভোটিং আৰম্ভ হ'ব ৷ সেয়েহে হৰ্ষিতক ভোট দিবলৈ SonyLiv app নতুবা www.firstcry.com ৱেবচাইটৰ যোগেদি শিৱসাগৰৰ হৰ্ষিত নাথক ভোট দিবলৈ অনুৰোধ জনাই কণমানিজনে ৷

আনহাতে, শনিবাৰে আমগুৰিৰ মহাবিদ্যালয়,জাঁজী মহাবিদ্যালয়ৰ লগতে বিভিন্ন শিক্ষানুষ্ঠানতো ভোটদানৰ বাবে ব্যাপক প্ৰচাৰ চলায় হৰ্ষিত নাথৰ মাতৃৰ লগতে বিভিন্ন দল-সংগঠন তথা অনুৰাগীয়ে।