আমগুৰি ৩১ আগষ্টঃ শিৱসাগৰ জিলাৰ আমগুৰি প্ৰধান ডাকঘৰৰ অন্তৰ্গত দেওৰজা মৈদাম শাখা ডাকঘৰত স্থানীয় দৰিদ্ৰ ৰাইজৰ বিভিন্ন সঞ্চয় শিতানত জমা ৰখা ২০ লক্ষাধিক ধনৰ হৰলুকি কৰাৰ অন্যতম অভিযুক্ত প’ষ্টমাষ্টৰ নৱজ্যোতি বৰুৱা গ্ৰেপ্তাৰ ৷ যোৱা নিশা আমগুৰি আৰক্ষীয়ে গ্ৰেপ্তাৰ কৰিবলৈ সক্ষম হয় বৰুৱাক । অভিযুক্ত প’ষ্টমাষ্টৰ নৱজ্যোতি বৰুৱা যোৱা দুটা মাহে আমগুৰি আৰক্ষীৰ চকুত ধূলি মাৰি পলায়ন কৰি আছিল যদিও আমগুৰি আৰক্ষীয়ে ম'বাইলৰ ল'কেচনৰ ভিত্তিত যোৱা নিশা ভগামুখৰ এক ভিতৰুৱা গাঁৱৰ পৰা গ্ৰেপ্তাৰ কৰিবলৈ সক্ষম হয় ।
উল্লেখ্য যে, অভিযুক্ত প’ষ্টমাষ্টৰ নৱজ্যোতি বৰুৱাই দৰিদ্ৰ ৰাইজৰ বিভিন্ন সঞ্চয় শিতানত জমা ৰখা ২০ লক্ষাধিক ধন আত্মসাৎ কৰাত জমাকাৰীৰ মাজত হাহাকাৰ পৰিস্থিতিৰ সৃষ্টি হৈছিল । বৃহত্তৰ অঞ্চলটোৰ পাঁচ সহস্ৰাধিক পৰিয়ালৰ লোকৰ দ্বাৰা একাউন্টত জমা কৰা ২০ লক্ষাধিক ধন ডাকঘৰটোৰ প’ষ্টমাষ্টৰ নৱজ্যোতি বৰুৱাই বিভিন্ন কৌশলেৰে হৰলুকি কৰাৰ গুৰুতৰ অভিযোগ উত্থাপন হোৱাৰ পিছতে ভুক্তভোগী জমাকাৰীয়ে আমগুৰি আৰক্ষী থানাত এজাহাৰ দাখিল কৰাত অৱশেষত আৰক্ষীৰ জালত পৰে নৱজ্যোতি বৰুৱা ৷
জানিব পৰা মতে দেওৰজা শাখা ডাকঘৰৰ প’ষ্টমাষ্টৰগৰাকীয়ে ভুৱা পাছবুক একাউন্ট খোলাৰ উপৰিও জমাকাৰীৰ পাছবুকত জমাকৃত ধনৰ পৰিমাণ লিখাৰ বিপৰীতে লেজাৰত জমাকৃত ধনৰ সবিশেষ অন্তৰ্ভুক্ত নকৰাৰ লগতে অনলাইন পোষ্টিংৰ ব্যৱস্থা নকৰি হাতে লিখা পাছবুকত ষ্টাম্প মাৰি জমাকাৰীৰ ধন নিজৰ পকেটত ৰখাৰ গুৰুতৰ অভিযোগ উত্থাপন হৈছিল ৷ অভিযুক্ত নৱজ্যোতি বৰুৱাই বহু হিতাধিকাৰীৰ সঞ্চিত ধন প্ৰায় ২০১৫ চনৰ পৰাই আমগুৰি প্ৰধান ডাকঘৰত জমা দিয়াৰ বিপৰীতে নিজৰ লগত ৰাখি বিলাসী জীৱন যাপন কৰি আহিছিল ৷ শেহতীয়াকৈ এই কেলেংকাৰীৰ তথ্য পোহৰলৈ অহাত তীব্ৰ চাঞ্চল্যৰ সৃষ্টি কৰিছে অঞ্চলজুৰি ।
এইক্ষেত্ৰত বিভাগীয় ফালৰপৰা তদন্ত কৰি দোষীক শাস্তিৰ দাবী জনোৱাৰ লগতে পাবলগীয়া হিতাধিকাৰীৰ জমাকৃত ধন ঘূৰাই দিয়াৰ ব্যৱস্থা কৰিবলৈ দাবী জনাইছে স্থানীয় ৰাইজে । আমগুৰি আৰক্ষীৰ সাফল্যক বৃহত্তৰ দেওৰজা বাসীয়ে সন্তোষ প্ৰকাশ কৰিছে । আৰক্ষীয়ে শুকুৰবাৰে অভিযুক্তগৰাকীক আদালতত হাজিৰ কৰায় চাৰিদিনৰ বাবে নিজৰ জিম্মাত লয় ৷
