নলবাৰী, ৬ ছেপ্টেম্বৰ: নলবাৰীৰ বালিলেচা কালী দেৱালয়ত(Balilesha Kali Mandir) সংঘটিত হৈছে এক অঘটন । দেৱালয়ৰ পুখুৰীত গা ধুৱলৈ গৈ নিখোজ হ’ল এজন শিল্পী (Theatre artist missing in Nalbari)৷ নিখোজ হৈ থকা শিল্পীগৰাকী থিয়েটাৰৰ নৃত্যশিল্পী তথা বজালী জিলাৰ সৰুপেটাৰ কণ দাস (২৬) বুলি জানিব পৰা গৈছে ।
উল্লেখযোগ্য যে নলবাৰীৰ বালিলেছাত চলি আছিল নাট্যগোষ্ঠী লুইতপৰীয়া থিয়েটাৰৰ(Luitporia Theatre) নাট প্ৰদৰ্শন । মঙলবাৰে পুৱা গা ধুবলৈ বুলি কালী মন্দিৰ প্ৰাংগণত থকা পুখুৰীত গা ধুবলৈ নামিছিল লগৰ সহকৰ্মীৰ সহিতে কণ দাসে । স্থানীয় লোকৰ মন্তব্য অনুসৰি পুখুৰীত গা ধুই থাকোতেই সংঘটিত হয় এই কৰুণ ঘটনাটো ।
পূৰ্বেও কালী দেৱালয়ৰ উক্ত পুখুৰীটোত লোক নিখোজ হোৱাৰ ঘটনা সংঘটিত হোৱা বুলি জানিবলৈ দিয়ে স্থানীয় লোকে ৷ বৰ্তমান নলবাৰী আৰক্ষী আৰু এছ ডি আৰ এফৰ লোক উপস্থিত হৈ নিখোজ যুৱ শিল্পীজনৰ সন্ধানত অব্যাহত ৰাখিছে উদ্ধাৰ অভিযান (SDRF mission in Nalbari)।
লগতে পঢ়ক: শিক্ষক দিৱসৰ দিনাই নগাঁও মহাবিদ্যালয়ত গুৰুজনাৰ সৃষ্টিক চৰম অপমান
