নলবাৰী, 15 জানুৱাৰী: আলফা আৰু চৰকাৰৰ শান্তি আলোচনা সন্দৰ্ভত গুৰুত্বপূৰ্ণ মন্তব্য আগবঢ়াইছে আলোচনা পন্থী আলফা নেতা ৰাজু বৰুৱাই ৷ তেওঁ কয় যে, আলফা আৰু আৰু চৰকাৰৰ মাজত শান্তি আলোচনা প্ৰায় সমাপ্ত হৈছে ৷ অসমৰ প্ৰধান সমস্যা সমূহ আৰু আলফাৰ চৰ্ত সমূহক লৈ কেন্দ্ৰীয় চৰকাৰৰ সৈতে ইতিমধ্যেই আলোচনা সম্পূৰ্ণ হৈছে ৷ গতিকে এই প্ৰক্ৰিয়া এতিয়া সম্পূৰ্ণ ৰূপে নিৰ্ভৰ কৰিব কেন্দ্ৰীয় চৰকাৰৰ ওপৰত ৷
শান্তি চুক্তিত স্বাক্ষৰ কৰিবলৈ সাজু আলোচনাপন্থী আলফা নেতা ৰাজু বৰুৱা
আলোচনাপন্থী আলফা নেতা গৰাকীয়ে লগতে কয় যে,কেন্দ্ৰীয় চৰকাৰে শান্তি চুক্তিত স্বাক্ষৰ কৰিবলৈ মাতিলে তেওঁলোক যাবলৈ সাজু হৈ আছে ৷ নলবাৰীৰ জাহাৰ শ্ৰী শ্ৰী মহাপ্ৰভু বাৰগোপাল থানত উপস্থিত হৈ এই মন্তব্য আগবঢ়াই ৰাজু বৰুৱাই ৷ উল্লেখ্য যে,আলফা-চৰকাৰৰ আলোচনা সন্দৰ্ভত ইতিমধ্যে বিভিন্ন মহলত চৰ্চা অব্যাহত আছে ৷ তাৰ মাজতে ৰাজু বৰুৱাই কৰা এই মন্তব্যই যথেষ্ট গুৰুত্ব বহন কৰিছে ৷
