নলবাৰী, 5 মে’ : নলবাৰী জিলাৰ অন্যতম বৃহত্তৰ সমষ্টি হৈছে বৰক্ষেত্ৰী ৷ পশ্চিম নলবাৰী অঞ্চলৰ শিক্ষা-দীক্ষা, সাংস্কৃতিক আদি সকলো দিশতে তুলনামূলকভাৱে আগবঢ়া বৰক্ষেত্ৰী সমষ্টি ৷ এই বৰক্ষেত্ৰীৰে প্ৰাণকেন্দ্ৰস্বৰূপ বৃহত্তৰ মুকালমুৱা অঞ্চল ৷ দীৰ্ঘদিনৰে পৰা মুকালমুৱাবাসীয়ে বঞ্চিত হৈ আহিছে উপযুক্ত সা-সুবিধা লাভৰ পৰা ৷
স্থানীয় দল-সংগঠনৰ বহু প্ৰতিবাদৰ পিছত অৱশেষত মুকালমুৱাবাসীয়ে লাভ কৰিছিল মহকুমা অসামৰিক চিকিৎসালয়ৰ নৱনিৰ্মিত ভৱনৰ অনুমোদন (Government hospital in Mukalmua)৷ সেই অনুসৰি, 2019 চনৰ 8 মাৰ্চত মন্ত্ৰী পীযুষ হাজৰিকাই মাংগলিক কাৰ্যসূচীৰে স্থাপন কৰিছিল চিকিৎসালয়খনৰ নৱনিৰ্মিত ভৱনৰ আধাৰশিলা ৷ প্ৰায় তিনিটা বছৰৰ মূৰত কোনোমতে নিৰ্মাণকাৰ্য সম্পন্ন হৈছিল উক্ত ভৱনৰ ৷
প্ৰায় 13 কোটি টকা ব্যয় সাপেক্ষে নিৰ্মাণ কৰা এই ভৱনত সম্প্ৰতি মেলিছে ফাঁট ৷ উল্লেখ্য যে, নৱনিৰ্মিত ভৱনটো চিকিৎসা সেৱাৰ বাবে মুকলি কৰা হোৱা নাছিল ৷ কিন্তু দুৰ্ভাগ্যজনকভাৱে ভৱনটো মুকলি নৌহওঁতেই অধিকাংশ দেৱালতে দেখা গৈছে ফাঁট ৷ চাৰিমহলীয়া ভৱনটোৰ বাহিৰভাগত এনেদৰে ফাঁট মেলা কথাটো স্বীকাৰ কৰিছে খোদ চিকিৎসালয়খনৰ ভাৰপ্ৰাপ্ত স্বাস্থ্য বিষয়া চক্ৰধৰ বৰ্মনে ৷
মুকালমুৱা সামূহিক চিকিৎসালয়খন মহকুমা অসামৰিক চিকিৎসালয়লৈ উন্নীতকৰণ হোৱাৰ পিছত নিৰ্মাণকাৰ্য আৰম্ভ হৈছিল ভৱনটোৰ ৷ কিন্তু দীৰ্ঘদিনে ঠিকাদাৰৰ হেমাহিৰ বাবে ইয়াক সম্পূৰ্ণ কৰিবলৈ প্ৰয়োজন হয় যথেষ্ঠ সময়ৰ ৷ এতিয়া সম্পূৰ্ণ হোৱাৰ পিছতো ঠিকাদাৰৰ পালমৰা কামৰ বাবেই ভৱনটোৰ দেৱালত ফাঁট মেলা পৰিলক্ষিত হৈছে ৷
লগতে চাওক : দিছপুৰ মহাবিদ্যালয়ৰ নামত ভুৱা mail ID প্ৰস্তুত কৰি ৭৬ লাখ টকা হৰলুকি কৰিলে কোনে ?
