নলবাৰী,3 ডিচেম্বৰ: নলবাৰী নাট্য মন্দিৰ আৰু শ্বহীদ ভৱন বাকৰিত ১২ ডিচেম্বৰৰ পৰা ১৭ ডিচেম্বৰলৈ ৬ দিনীয়াকৈ অনুষ্ঠিত হ'ব নলবাৰী গ্ৰন্থমেলা ৷ মঙলবাৰে এই সন্দৰ্ভত নলবাৰী নন্দেশ্বৰ শইকীয়া প্ৰেক্ষাগৃহত সম্বোধন কৰা হয় এখন সংবাদমেলৰ ৷ সংবাদমেলৰ আত ধৰে সদৌ অসম ছাত্ৰ সন্থাৰ কেন্দ্ৰীয় কাৰ্য নিৰ্বাহক তথা গ্ৰন্থ মেলাৰ সম্পাদক ভৱজিৎ বেজবৰুৱাই ৷ আনহাতে গ্ৰন্থ মেলাৰ কাৰ্যসূচী সন্দৰ্ভত বিস্তাৰিত ভাৱে বৰ্ণনা কৰে নলবাৰীৰ জিলা উপাযুক্ত তথা নলবাৰী গ্ৰন্থমেলাৰ সভাপতি ভাৰত ভূষণ দেৱ চৌধুৰীয়ে ৷
উল্লেখ্য যে, ১২ ডিচেম্বৰত উদ্ধোধনী অনুষ্ঠানত উদ্ধোধক হিচাপে উপস্থিত থাকিব অসম মহিলা বিশ্ববিদ্যালয়ৰ উপাচাৰ্য ড0 মালিনী গোস্বামী আৰু মুখ্য অতিথি হিচাপে উপস্থিত থাকিব বৰপেটা সত্ৰৰ বুঢ়া সত্ৰাধিকাৰ বশিষ্ঠ দেৱ শৰ্মা ৷ লগতে উপস্থিত থাকিব মঙ্গলদৈ লোকসভা সমষ্টিৰ সাংসদ, বিধায়ককে ধৰি সদৌ অসম ছাত্ৰ সন্থাৰ মুখ্য উপদেষ্টা ড0 সমুজ্বল কুমাৰ ভট্টাচাৰ্যৰ লগতে বিভিন্ন জন বিশিষ্ট ব্যক্তি ৷ আনহাতে ১৭ ডিচেম্বৰৰ সামৰণি অনুষ্ঠানত মন্ত্ৰী চন্দ্ৰ মোহন পাটোৱাৰীৰ লগতে কেইবাজনো বিশিষ্ট ব্যক্তি উপস্থিত থাকিব বুলি জনাই আয়োজক মণ্ডলীয়ে ৷ লগতে সামৰণিৰ নিশা সাংস্কৃতিক সন্ধ্যত থাকিব তৰালী শৰ্মা আৰু দিগন্ত ভড়ালীৰ গীতৰ শৰাই ৷
