নলবাৰী, ২৮ মাৰ্চ : সোমবাৰে নলবাৰীত পিতৃৰ স্মৃতিচৰণ সভাত উপস্থিত থাকে কেবিনেট মন্ত্ৰী জয়ন্ত মল্ল বৰুৱা (Assam minister Jayanta Malla Baruah) । এই উপলক্ষে নলবাৰী নাট্যমন্দিৰত অনুষ্ঠিত সভাত উপস্থিত থকি সাংবাদিকেৰে হোৱা সাক্ষাৎকাৰত কেইবাটাও প্ৰসংগত মত ব্যক্ত কৰে মন্ত্ৰীগৰাকীয়ে । তাৰ মাজতে গামোচা বিতৰ্কক লৈ এইবাৰ মুখ খুলিছে মন্ত্ৰী জয়ন্ত মল্ল বৰুৱাই (Jayanta Malla Baruah reacts on Gamosa controversy) । অসমীয়া-বঙালীৰ সমন্বয়ৰ প্ৰতীকীৰূপে অসমীয়াৰ স্বাভিমান গামোচাক যি বিকৃতকৰণ কৰিছে তাক লৈ দুখ প্ৰকাশ কৰে মন্ত্ৰী জয়ন্ত মল্ল বৰুৱাই ।
মন্ত্ৰীগৰাকীয়ে কয় যে অসমীয়া জাতি অত্যন্ত আবেগিক জাতি । স্পৰ্শকাতৰ জাতিটোক লৈ আবেগিক মানুহ আমি ৷ আমি জাতিটোৰ কাৰণে সৰ্বস্ব কৰিব পাৰো ৷ আমি জাতিটোৰ কাৰণে কিবা কৰিবলৈ হ'লে বিভিন্ন ফ'ৰামত কথা পাতি কৰিব লাগে ৷ হয়তো এইটো নকৰাৰ বাবেই সমালোচনাৰ সম্মুখীন হ’ল (Assam Gamosa Controversy) ৷ বাংলা সাহিত্য সভাই অসমৰ দুই-চাৰিটা সংগঠনৰ সৈতে আলোচনাত বহাটো জৰুৰী আছিল ।
আলোচনাত বহি কামবোৰ কৰিলে হয়তো আজি গামোচাক এনে এক বিকৃত ৰূপত দেখা নগ'লহেঁতেন । লগতে বিতৰ্কৰো সূচনা নঘটিলহেঁতেন । আনহাতে, কোনো কাৰণতে স্বাভিমানত আঘাত হোৱা কাম কোনোৱে কৰিব নালাগে বুলিও মত প্ৰকাশ কৰে মন্ত্ৰীগৰাকীয়ে । ইফালে গামোচা বিতৰ্কক লৈ লাচিত সেনাই অসমৰ তিনি মন্ত্ৰী-আমোলাৰ বিৰুদ্ধে গোচৰ ৰুজু কৰাৰ প্ৰসংগত মন্ত্ৰীগৰাকীয়ে কয়, উক্ত অনুষ্ঠানত মন্ত্ৰী বা আমোলাৰ কি দোষ (Minister Baimal Bora in Gamosa controversy) ।
কোনোবাই সম্বৰ্ধনা আকাৰে কিবা যাচিলে তাক ল'বই । হয়তো পৰৱৰ্তী সময়ত তাক লৈ আলোচনা চলিছে । ইয়াত মন্ত্ৰী-আমোলাৰ কোনো দোষ নাই বুলি মন্তব্য কৰে মন্ত্ৰী জয়ন্ত মল্ল বৰুৱাই । আনহাতে, সমষ্টি পুনৰ নিৰ্ধাৰণৰ ক্ষেত্ৰতো কেতবোৰ গুৰুত্বপূৰ্ণ মন্তব্য প্ৰকাশ কৰে মন্ত্ৰী জয়ন্ত মল্ল বৰুৱাই । মন্ত্ৰীগৰাকীয়ে কয় যে নিৰ্বাচন আয়োগৰ এটি দলে শাসক-বিৰোধীৰে আলোচনাত বহিছে । ইয়াত কোনোবাই বিৰোধ কৰাটো সকলোৰে নিজ নিজ অধিকাৰ ।
লগতে অসমীয়া জাতি ৰক্ষা কৰিবলৈ সমষ্টি পুনৰ নিৰ্ধাৰণ অত্যন্তই প্ৰয়োজন বুলি কয় মন্ত্ৰীগৰাকীয়ে । অসমীয়া জাতিয়ে অসম আন্দোলন, ৰাষ্ট্ৰীয় নাগৰিকপঞ্জী উন্নীতকৰণত বিফল হৈছে । সাম্প্ৰতিক সময়ত অসমীয়া জাতিৰ ভৱিষ্যতৰ স্বাৰ্থত সমষ্টি পুনৰ নিৰ্ধাৰণৰ বাহিৰে আৰু বেলেগ একো পথেই নাই বুলি মন্তব্য কৰে মন্ত্ৰী জয়ন্ত মল্ল বৰুৱাই ।
