নলবাৰী, 11 নৱেম্বৰ : সমাধানৰ পথত নলবাৰী জিলাৰ বহুদিনীয়া এটা সমস্যা । ৰাষ্ট্ৰীয় ঘাইপথৰ বিকল্প পথ হিচাপে নিৰ্মাণ হৈ থকা সন্ধ্যা-বৰকুৰা পথৰ বৰকুৰাত সোমবাৰে আনুষ্ঠানিকভাৱে উৰণীয়া সেতুৰ আধাৰশিলা স্থাপন কৰে গড়কাপ্তানি মন্ত্ৰী ড° হিমন্ত বিশ্ব শৰ্মাই । 70 কোটি টকা ব্যয় সাপেক্ষে নিৰ্মাণ হ'ব লগীয়া এই উৰণীয়া সেতুখন 820 মিটাৰ দৈৰ্ঘ্যৰ বুলি জানিব পৰা গৈছে ৷ আধাৰশিলা স্থাপন অনুষ্ঠানৰ মুকলি সভাত মন্ত্ৰী হিমন্ত বিশ্ব শৰ্মাই নতুন কেইবাখনো আঁচনি ঘোষণা কৰাৰ লগতে নলবাৰীৰ সন্ধ্যাত তৃতীয় খন উৰণীয়া সেতু নিৰ্মাণ কৰা হ'ব বুলিও ঘোষণা কৰে ।
উক্ত অনুষ্ঠানত উপস্থিত থাকি মন্ত্ৰীগৰাকীয়ে নলবাৰীৰ বাট-পথৰ বাবে নতুনকৈ 33 কোটি টকা অনুমোদন দিব বুলিও ঘোষণা কৰে । ইয়াৰোপৰি সকলো স্বামীহীনা মহিলাক ইন্দিৰা মিৰি আঁচনিৰ জৰিয়তে বিধবা পেন্সন প্ৰদানৰ লগতে নতুন আঁচনি অনুসৰি এতিয়াৰে পৰা আই চি ইউত থকা ৰোগীক অটল অমৃত অভিযানৰ পৰা 2 লাখ টকা প্ৰদান কৰা হ'ব ঘোষণা কৰে মন্ত্ৰী হিমন্ত বিশ্ব শৰ্মাই ।
উল্লেখ্য যে, 12 বছৰৰ তলৰ যিকোনো শিশুৰ শৈল্য চিকিৎসাৰ বাবেও অটল অমৃত যোজনাৰ অধীনত দুই লাখ টকা ঘোষণা কৰে মন্ত্ৰীগৰাকীয়ে । অসম দৰ্শন আঁচনিৰ দ্বাৰা 100 বছৰ পুৰণি 1000 থান, মন্দিৰ আৰু নামঘৰৰ উন্নয়নৰ নামত 700 কোটি টকা প্ৰদানৰ লগতে গৃহ ঋণৰ বাবে 2 লাখ 50 হাজাৰ টকা ৰাজ সাহাৰ্য প্ৰদান আৰু অভিনন্দন আঁচনিৰ জৰিয়তে শিক্ষাৰ্থী সকলক 50 হাজাৰ টকা প্ৰদানৰ কথা ঘোষণা কৰে হিমন্ত বিশ্ব শৰ্মাই । আনহাতে মুদ্ৰা আঁচনিৰ ঋণ ল'লে অসম চৰকাৰে 10000 টকা ঋণ পৰিশোধ কৰিব বুলিও এই সভাত হিমন্ত বিশ্ব শৰ্মাই ঘোষণা কৰে । লগতে অৰুন্ধতি আঁচনিৰ জৰিয়তে এক টোলা সোণৰ সলনি এতিয়া সোণৰ মূল্য প্ৰদান কৰা হ'ব বুলিও ঘোষণা কৰে মন্ত্ৰী গৰাকীয়ে ।
উক্ত সভাত মন্ত্ৰী হিমন্ত বিশ্ব শৰ্মাৰ লগতে সাংসদ দিলীপ শইকীয়া, বিধায়ক অশোক শৰ্মা, নাৰায়ণ ডেকা, গড়কাপ্তানি বিভাগৰ সচিব দিব্যজোতি চহৰীয়াকে ধৰি কেইবাজনো বক্তাই ভাষণ প্ৰদান কৰে । উল্লেখ্য যে, এই সভাতে উৰণীয়া সেতু স্থাপনৰ ফলত স্থানীয় লোকৰ হ'ব পৰা ক্ষতি সম্পৰ্কে এগৰাকী মুক্তি যোদ্ধাৰ পুত্ৰই প্ৰতিবাদ কৰি মঞ্চতে ক্ষোভ প্ৰকাশ কৰে ।
