নলবাৰী, 17 জুন : নলবাৰীৰ এগৰাকী ৰাষ্ট্ৰীয় ভলীবল খেলুৱৈ৷ নাম কল্পনা কলিতা ৷ পাঁচবাৰকৈ ৰাষ্ট্ৰীয় পৰ্যায়ত ভলীবল খেলা খেলুৱৈ কল্পনা এতিয়া আৰ্থিক সংকটত ৷ নলবাৰীৰ কয়াকুছি গাঁৱৰ পিতৃহাৰা কল্পনাই ওড়িশা, মধ্যপ্ৰদেশ, হাৰিয়ানা, চেন্নাই, ডেৰাডুন আদি দেশৰ ভিন্ন প্ৰান্তত অনুষ্ঠিত ভলীবল প্ৰতিযোগিতাত অংশ লৈ নলবাৰীলৈ সুনাম কঢ়িয়াই আনিছিল ৷ এখন সৰু গাঁৱৰ পৰা গৈ ৰাষ্ট্ৰীয় পৰ্যায়ত দুহাতৰ যাদুৰে দৰ্শকক মোহাচ্ছন্ন কৰা কল্পনাই এতিয়া দুবেলা দুসাঁজ খোৱাৰ বাবে চিন্তা কৰিব লগীয়া হৈছে ৷
একমাত্ৰ উপাৰ্জনকাৰী পিতৃৰ বিয়োগৰ পাচত কল্পনাই গাই গৰু পুহি কোনো মতে পৰিয়াল পোহপাল দি আহিছিল যদিও আংশিক লকডাউনৰ বাবে আৰ্থিক সংকটে দেখা দিয়ে ৷ খেলুৱৈ গৰাকীৰ আৰ্থিক দুৰাৱস্থাৰ খবৰ পোৱাৰ লগে লগে বৃহস্পতিবাৰে মুখ্যমন্ত্ৰীৰ ৰাজনৈতিক সচিব তথা নলবাৰী সমষ্টিৰ বিধায়ক জয়ন্তমল্ল বৰুৱা উপস্থিত হয় ৷ খেলুৱৈ কল্পনাই অকলশৰীয়াকৈ কাম কৰি পৰিয়াল পোহপাল দিয়া কাৰ্যৰ প্ৰতি সন্মান জনাই পঞ্চাশ হাজাৰ টকাৰ আৰ্থিক সাহায্য আগবঢ়ায় ৷ কিন্তু অকলশৰে জীৱন যুঁজত অৱতীৰ্ণ হোৱা কল্পনাই এটি স্থায়ী সংস্থাপন প্ৰদানৰ বাবে চৰকাৰলৈ অনুৰোধ জনায় ৷
লগতে পঢ়ক: আন্ত:ৰাষ্ট্ৰীয় প্ৰেক্ষাপটত জিলিকিলে অসমৰ চাৰিগৰাকীকৈ শিক্ষক
