নলবাৰী, ৩১ মে': বছৰৰ প্ৰথমতো বানৰ কৱলত পৰা পশ্চিম নলবাৰীৰ বিস্তৃৰ্ণ অঞ্চল বৰ্তমানেও প্লাৱিত হৈ আছে । জিলাখনত বুঢ়াদিয়া নৈয়ে প্ৰতিবছৰে মথাউৰি ভাঙি তাণ্ডৱ চলাই আহিছে যাৰ ফলত বিস্তৃৰ্ণ অঞ্চলৰ কৃষি ভূমি ক্ষতিগ্ৰস্থ হোৱাৰ লগতে মীনপালকসকল যথেষ্ট লোকচানৰ সন্মুখীন হৈছে ।
উল্লেখ্য যে, বানপানীৰ কৱলত এতিয়াও বহু পৰিয়ালৰ গৃহ বাট-পথ বুৰ গৈ আছে । বানপানীৰ ফলত পৰা এইসকল বানক্ৰান্ত ৰাইজে মানুহ-গৰু একেলগে সহাৱস্থান কৰিব লগা হৈছে । ইফালে মহামাৰী কৰ'ণাৰ বাবে দেশত চলি থকা লকডাউনৰ মাজতে এইসকল বানক্ৰান্ত ৰাইজৰ বিভীষিকাময় পৰিস্থিতিৰ সন্মুখীন হৈছে ।
আনহাতে, পশ্চিম নলবাৰীৰ বানক্ৰান্ত ৰাইজৰ বৰ্তমানেও কোনো জনপ্ৰতিনিধিৰ খবৰ নলোৱাৰ অভিযোগ । পোৱা নাই বহু পৰিয়ালে বান সাহাৰ্য্য । ধৰ্মপুৰ সমষ্টিৰ অন্তৰ্গত এই বানক্ৰান্ত ৰাইজৰ মন্ত্ৰী চন্দ্ৰমোহন পাটোৱাৰীয়ে কিয় খবৰ নলয় বুলি অভিযোগ উত্থাপন কৰে স্থানীয়ই ।
