নলবাৰী, 10 ছেপ্টেম্বৰ : অনেক হিচাপ-নিকাচ কৰি কৌশলেৰে পুনৰ অসম গণ পৰিষদৰ সভাপতিৰ গাদী দখল কৰিছিল অতুল বৰাই ৷ সভাপতিৰ আসনৰ মোহত যেন বাৰুকৈয়ে মোহাচ্ছন্ন জ্যেষ্ঠ নেতাগৰাকী ৷ কিন্তু অতুল বৰাৰ সকলো আশা-সপোন ভংগ কৰিলে কামৰূপ মহানগৰ জিলাৰ দেৱানী আদালতৰ এক নিৰ্দেশে ৷ অগপৰ নৱ গঠিত সমিতিৰ সন্দৰ্ভত স্থগিতাদেশ জাৰী কৰিছিল কামৰূপ মহানগৰ জিলাৰ দেৱানী আদালতে ৷ কিন্তু তথাপি হাৰিব খোজা নাই অতুল বৰা ৷ এইবাৰ এই বিষয় সন্দৰ্ভত উচ্চ ন্য়ায়ালয়ৰ দ্বাৰস্থ হ’বলৈ স্থিৰ কৰিছে নেতাগৰাকীয়ে ৷
নলবাৰীত সাংবাদিকৰ আগত প্ৰকাশ কৰা অনুসৰি, নিৰ্বাচন আয়োগৰ নীতি-নিৰ্দেশনা অনুসৰি ক’ভিডৰ নীতি-নিয়ম মানি গঠন কৰা হৈছিল অগপৰ নতুন সমিতি । আনকি এই নতুন সমিতি গঠনৰ প্ৰতিবেদন দাখিল কৰা হৈছিল নিৰ্বাচন আয়োগক ৷ তাৰ পাচতো আদালতে এই ক্ষেত্ৰত বাধা-নিষেধ আৰোপ কৰাত উচ্চ ন্যায়ালয়ৰ কাষ চপাৰ সিদ্ধান্ত লৈছে অতুল বৰাই ৷
উল্লেখ্য যে, যোৱা 26 আগষ্টত কামৰূপ মহানগৰ জিলাৰ দেৱানী আদালতৰ এক নিৰ্দেশ যোগে অগপৰ সাধাৰণ পৰিষদৰ বৈঠক আয়োজনত বাধা-নিষেধ আৰোপ কৰিছিল ৷ কিন্তু আদালতৰ নিৰ্দেশৰ প্ৰতিলিপি লাভ কৰাত পলম হোৱাৰ দোহাই দি 27 আগষ্টত দুপৰীয়া সাধাৰণ পৰিষদৰ বৈঠক অনুষ্ঠিত কৰে অগপই ৷ এই বৈঠকতে তদানীন্তন সভাপতি অতুল বৰাক পুনৰ দলটোৰ সভাপতিৰ দায়িত্বভাৰ অৰ্পন কৰা হয় ৷
অগপ নেতৃত্বই সদৰী কৰা অনুসৰি তেওঁলোকে আদালতৰ নিৰ্দেশ লাভ কৰিছিল 12 বজাত ৷ কিন্তু বৈঠক অনুস্থিত হৈছিল 11.45 মিনিটত ৷ কিন্তু অগপ নেতৃত্বই গ্ৰহণ কৰা এই কৌশলী স্থিতিক নস্যাৎ কৰি বৈঠকত কাৰ্যকৰী কৰা সকলোবোৰ সিদ্ধান্তৰ ক্ষেত্ৰত স্থগিতাদেশ জাৰী কৰে দেৱানী আদালতে ৷ কিন্তু নিজৰ আকোৰগোঁজ স্থিতিত অটল অগপ নেতৃত্বই চলে-বলে কৌশলে সিদ্ধান্ত সমূহ কাৰ্যকৰী কৰাৰ চেষ্টা অব্যাহত ৰাখিছে ৷ তাৰেই পদক্ষেপ হিচাপে উচ্চ ন্যায়ালয়ৰ শৰণাপন্ন হ’বলৈ মন মেলিছে অতুল বৰাই ৷
আনহাতে অগপ-বিজেপিৰ মিত্ৰতা সন্দৰ্ভত অতুল বৰাই কয় য়ে, মিত্ৰতা মানেই দলীয় আদৰ্শ বিসৰ্জন নহয়, পবিন্দ্ৰ ডেকাই নিজৰ মনোভাব ব্যক্ত কৰিব পাৰে । ইয়াৰ লগতে বিদেশী বিষয়টো সম্পৰ্কে কেন্দ্ৰীয় চৰকাৰে সঠিক সিদ্ধান্ত গ্ৰহণ কৰিব বুলি এতিয়াও আশাবাদী হৈ আছে অতুল বৰা । নলবাৰীৰ নিজ পকোৱাত অনুষ্ঠিত জ্যেষ্ঠ অগপ নেতা তথা প্ৰাক্তন পৌৰপতি প্ৰয়াত অকন মল্ল বৰুৱাৰ স্মৃতিচাৰণ সভাত উপস্থিত হৈ সংবাদ মাধ্যমৰ আগত এইদৰে কয় অতুল বৰাই ।
লগতে পঢ়ক : অন্ত পৰিল ১০৪ দিনীয়া উৎকণ্ঠাৰ, নুমাল বাঘজানৰ জুই !
