নলবাৰী, 12 আগষ্ট : এগৰাকী উপেক্ষিত জাতীয়তাবাদী নেতা ৷ বিদেশী বহিস্কাৰ আন্দোলনৰ এগৰাকী অন্যতম নেতা নাওধন ডেকা ৷ হাইস্কুলীয়া জীৱনতেই আন্দোলনত জপিয়াই পৰা এইগৰাকী নেতাই ঘগ্ৰাপাৰ অঞ্চলত বিদেশী বহিস্কাৰ আন্দোলনৰ নেতৃত্ব বহন কৰিছিল । ছয়বাৰকৈ জে’ললৈ যাব লগা হোৱা এইগৰাকী অসম আন্দোলনৰ নেতা আজিও উপেক্ষিত । নলবাৰী জিলাৰ নিজখগটা গাঁৱৰ এই নেতাগৰাকীৰ থাকিবলৈ নাই নিজ এটি ঘৰ ৷ ৩১ নং ৰাষ্ট্ৰীয় ঘাইপথৰ সমীপৰ ঘগ্ৰাপাৰ পশু চিকিৎসা কেন্দ্ৰৰ গাতে লাগি থকা এটা চৰকাৰী গৃহত অস্থায়ী ভাৱে বাস কৰে তেওঁ ।
আন্দোলনৰ পাচত নতুন চৰকাৰ হ’ল, ৰাজপাটত বহিল আন্দোলনকাৰী বহু নেতা ৷ কিন্তু এইগৰাকী নাওধন ডেকাৰ খবৰ ল’বলৈ আহৰি নাপালে কোনোৱে ৷ নগেন শৰ্মা থকালৈকে খবৰ-খাতি লৈছিল যদিও বৰ্তমান তেওঁ এলাগী ৷ জাতীয়তাবাদৰ ঢৌত উটিয়েই বৰ্তমান মন্ত্ৰী হৈ থকা চন্দ্ৰমোহন পাটোৱাৰীৰো ঘনিষ্ঠ আছিল নাওধন ডেকা ৷ কিন্তু জাতীয়তাবাদৰ সূঁতিৰে বৈ আহি হঠাৎ ৰাষ্ট্ৰীয়তাবাদৰ সমূদ্ৰত সাঁতুৰিবলৈ ধৰা পাটোৱাৰীয়ে খবৰ ল’বলৈ আহৰি পোৱা নাই এইগৰাকী আন্দোলনৰ গুৰি ধৰোঁতাৰ ৷
উল্লেখযোগ্য যে, ১৯৮৩-৮৪ চনত নলবাৰী কলেজৰ ছাত্ৰ একতা সভাৰ সহকাৰী সম্পাদক হিচাপে থাকি কলেজীয়া জীৱন পাৰ কৰিছিল নাওধন ডেকাই । অসম চুক্তিৰ পাচত আন্দোলন কাৰী সকলৰ নেতৃত্বত হোৱা অসম গণ পৰিষদৰ এজন সক্ৰিয় নেতা হিচাপে ৰাজনৈতিক জীৱন আৰম্ভ কৰে তেওঁ । অসম গণ পৰিষদৰ প্ৰয়াত মন্ত্ৰী নগেন শৰ্মা আৰু চন্দ্ৰ মোহন পাটোৱাৰীৰ অতি ঘনিষ্ঠ এইগৰাকী নেতাই আজিও নেপালে একো সা-সুবিধা ।
নাওধন ডেকাই সদৌ অসম ছাত্ৰ সন্থাৰ পৰা ১৯৮১ চনতে শ্বহীদ আৰু নিৰ্যাতিতৰ প্ৰমাণ প্ৰত্ৰ আৰু নলবাৰী জিলা উপাযুক্তৰ কাৰ্যালয়ৰ পৰা চৰকাৰী প্ৰমাণ প্ৰত্ৰ লাভ কৰিও নাপালে সুফল । নিৰ্যাতিতৰ প্ৰমাণ প্ৰত্ৰ থকাৰ পিচতো এইগৰাকী নেতা বিজেপিৰ মিত্ৰজোঁটৰ চৰকাৰৰ পৰা বঞ্চিত হৈ আছে । ইফালে অৰ্থৰ অভাৱত এইগৰাকী আন্দোলনকাৰী নেতাৰ দুই পুত্ৰই আধৰুৱা কৰিব লগা হৈছে শিক্ষা । শেহতীয়া ভাৱে ডেকাৰ শৰীৰ দুৰ্বল হোৱাত পত্নীয়েও পেটৰ ভাত মোকলাবলৈ আনৰ ঘৰত বন কৰিব লগীয়া হৈছে । ইপিনে দুই পুত্ৰইও আনৰ দোকানত কাম কৰি চলাই আছে ঘৰটো ।
কিন্তু প্ৰশ্ন হয় জাতিৰ হকে আন্দোলনত নামি পৰি বহু নেতা মন্ত্ৰী হ’ল ফণীভূষণ চৌধুৰী, চন্দ্ৰ মোহন পাটোৱাৰী ,প্ৰফুল্ল মহন্তই শাসনৰ দায়িত্ব লৈও পাহৰিলে একালৰ সতীৰ্থ এইগৰাকী নাওধন ডেকাক । এয়াই নেকি একালৰ সতীৰ্থৰ প্ৰতি আস্থা । এনেদৰেই উপেক্ষিত হৈ ৰ'ব নেকি নাওধন ডেকাৰ দৰে এগৰাকী জাতীয়তাবাদী নেতা ৷
লগতে পঢ়ক : কৰ'ণাৰ বাবে মন্থৰ হৈ গ'ল দুশবছৰীয়া চাহ উদ্যোগ
