নলবাৰী, 10 জুনঃ চৰম আৰ্থিক দৈন্যতা তথা হতাশাৰ সন্মুখীন হোৱা ৭০ উৰ্ধৰ বৃদ্ধা শকুন্তলাক অৱশেষত স্থানীয় যুৱকৰ সহযোগত উদ্ধাৰ কৰিলে শান্তি নিবাস অনাথ আশ্ৰমৰ স্বত্বাধিকাৰী মজিবুৰ ৰহমানে । স্বামী দিনেশ দাসক হেৰুওৱাৰ পিছত দিকবিদিক হেৰুৱাই অসহনীয় যন্ত্ৰণাত দিন অতিবাহিত কৰিছিল বৃদ্ধা গৰাকীয়ে । স্বামীৰ মৃত্যুৰ পিচত বৰ্ণিবাৰীৰ মাতৃ গৃহত থাকিবলৈ লৈছিল যদিও বয়স বৃদ্ধি হৈ অহাৰ পিছত নিজ মাতৃগৃহ এৰিবলগীয়া হ'ল বৃদ্ধাগৰাকীয়ে । যাৰ পৰিণতিত বৰ্ণিবাৰীৰ সাপ্তাহিক বজাৰেই আশ্ৰয়স্থলী হৈ পৰিল বৃদ্ধা গৰাকীৰ ।
নিজ ঘৰ ত্যাগ কৰি সাপ্তাহিক বজাৰ খনৰ মুকলি বজাৰ গৃহৰ এটি কোণত অনাহাৰ অনিদ্ৰাই দিন পাৰ কৰি আহিছিল বৃদ্ধা গৰাকীয়ে । বজাৰ খনৰ সচেতন ব্যৱসায়ীয়ে খাদ্যৰ যোগান ধৰিছিল যদিও যোৱা এবছৰে ভাত খোৱাৰ পৰা প্ৰায়ে বিৰত আছিল বৃদ্ধাগৰাকী । অৱশেষত বৃদ্ধা গৰাকীৰ কথা জানি শান্তি নিৱাসৰ স্বতাধিকাৰী তথা সাংবাদিক মজিবুৰ ৰহমানে বৃদ্ধা গৰাকীক উদ্ধাৰ কৰি প্ৰাথমিক চিকিৎসা কৰাৰ অন্তত শান্তি নিৱাস বৃদ্ধাশ্ৰম তথা অনাথ আশ্ৰমত আশ্ৰয়ৰ ব্যৱস্থা কৰে ।
লগতে পঢ়কঃ বিলাসীপাৰাত পথ দুৰ্ঘটনাত চাৰিজনৰ মৃত্যুঃ উত্তপ্ত পৰিস্থিতি
