নলবাৰী, ২৩ ছেপ্টেম্বৰ : মাটিৰ কাম কৰাৰ নামত মণ্ডলে মোটা অংকৰ ধন দাবী কৰাৰ অভিযোগ তুলি বুধবাৰে ঘগ্ৰাপাৰ ৰাজহ চক্ৰ বিষয়াৰ কাৰ্যালয়ত উপস্থিত হ’ল সদৌ অসম ছাত্ৰ সন্থাৰ নলবাৰী জিলা সমিতিৰ নেতা-কৰ্মীসকল । আছুৰ কৰ্মকৰ্তাসকলৰ অভিযোগ অনুসৰি, নলবাৰী জিলাৰ ঘগ্ৰাপাৰ ৰাজহ চক্ৰৰ কাৰ্যালয়ত মণ্ডলে গঢ়ি তুলিছে বৃহৎ চিণ্ডিগেট । ঘগ্ৰাপাৰ আঞ্চলিক ছাত্ৰ সন্থাৰ অভিযোগ অনুসৰি, সকলো মাটি-বাৰীৰ কাম বৃহৎ পৰিমাণৰ ধনৰ লেনদেন কৰি সম্পন্ন কৰি আহিছে লাট মণ্ডল, একাংশ গাঁওবুঢ়া আৰু একাংশ দালালে । বুধবাৰে সদৌ নলবাৰী জিলা ছাত্ৰ সন্থাৰ মুখ্য সাংগঠনিক সম্পাদক হীৰক জ্যোতি শৰ্মাৰ নেতৃত্বত ঘগ্ৰাপাৰ আঞ্চলিক ছাত্ৰ সন্থাই চক্ৰ বিষয়াৰ কাৰ্যালয় ঘেৰাও কৰি দালাল চক্ৰৰ বিৰুদ্ধে এখন স্মাৰকপত্ৰ প্ৰদান কৰে ।
ঘগ্ৰাপাৰ আঞ্চলিক ছাত্ৰ সন্থাৰ ভাৰপ্ৰাপ্ত সভাপতি ইলিয়াছ আলী আৰু সম্পাদক দ্বীপ বৰুৱাই স্বাক্ষৰ কৰা এই স্মাৰকপত্ৰখনত উল্লেখ কৰা হৈছে যে, বৃহত্তৰ ঘগ্ৰাপাৰ অঞ্চলৰ ৮০ শতাংশ জনসাধাৰণ কৃষিৰ ওপৰত নিৰ্ভৰশীল । কৃষিকাৰ্যৰ লগত জড়িত ব্যক্তিসকল মাটিৰ বিভিন্ন কাম-কাজৰ বাবে কাৰ্যালয়লৈ আহিলে কোনো গুৰুত্ব নিদি বাৰে বাৰে উভতাই পঠায় বুলি সংগঠনটোৱে অভিযোগ উত্থাপন কৰিছে । ফলত কৃষকসকলৰ মাটিৰ সমস্যা সমাধান নহয় আৰু এয়া এক দীৰ্ঘদিনীয়া সমস্যা বুলি অভিযোগ তুলিছে আছুৱে ৷ এই কাৰ্যসূচীত অংশগ্ৰহণ কৰি নলবাৰী জিলা উন্নতি সভাৰ সাধাৰণ সম্পাদক ৰাতুল চন্দ্ৰ ডেকাই কয় যে, একাংশ মণ্ডল, মহৰী, গাঁওবুঢ়া আৰু তেওঁলোকৰ লগত সহচৰ হিচাপে লাগি থকা আন একাংশ লোকে বৰ্তমান মাটি-বাৰী সম্পৰ্কীয় কাম-কাজ ঠিকা লৈ দালালৰাজ চলাই আছে ।
আনহাতে, ছাত্ৰ-ছাত্ৰীৰ শৈক্ষিক সম্পৰ্কীয় কাম-কাজত প্ৰয়োজনীয় নথি-পত্ৰৰ বাবে আয়ৰ প্ৰমাণ পত্ৰকে ধৰি বিভিন্ন কাগজ-পত্ৰ আদি মাহৰ পিছত মাহ ধৰি পৰি থাকে । সহজত কাম সম্পন্ন হোৱা ব্যৱস্থা এটা নাই বুলি তেওঁ অভিযোগ তোলে ৷ একাংশ মণ্ডলে কাৰ্যালয়ৰ চৌহদতে দালালৰ সহায়ত ধনৰ লেনদেন কৰাৰো অভিযোগ উত্থাপন কৰে ছাত্ৰ সন্থাই । সেয়ে, ৰাজহ চক্ৰৰ কাৰ্যালয়টোত দালাল চক্ৰ উৎখাৎ কৰি ৰাইজক সহায় কৰিবলৈ ছাত্ৰ সন্থাই দাবী জনায় ।
লগতে পঢ়ক:ৰাইমনা ৰাষ্ট্ৰীয় উদ্যানত ৫৭ জন চোৰাং চিকাৰীৰ আত্মসমৰ্পণ
