নগাঁও, 28 জুন: ৰাজ্য জুৰি ক্ৰমাৎ বৃদ্ধি পাইছে কোভিড-19 ত আক্ৰান্তৰ সংখ্যা ৷ বহু ঠাইত গণ সংক্ৰমণৰ দিশে গতি কৰিছে কোভিড-19 ভাইৰাছে ৷ সমান্তৰালকৈ নগাঁৱতো গণ সংক্ৰমণৰ দিশে গতি কৰিছে কৰ'ণা ভাইৰাছে ৷ দেওবাৰে নগাওঁ চহৰৰ মাজমজিয়াৰ কোনোধৰণৰ ভ্ৰমণ বৃত্তান্ত নথকা দুজনকৈ লোকৰ দেহত ধৰা পৰে কোভিড-19 ৰ অৱস্থিতি ৷ এই খবৰ বিয়পি পৰাৰ লগে-লগে নগাঁও চহৰত সৃষ্টি হৈছে এক আতংকময় পৰিৱেশ ৷
উল্লেখ্য যে, নগাওঁ চহৰৰ মাজমজিয়াৰ বিকানীৰ জুৱেলাৰীৰ স্বত্বাধিকাৰীৰ পুত্ৰ হিমাংশু মনিহাৰৰ লগতে আক্ৰান্ত হৈছে প্ৰতিষ্ঠানটোত কৰ্মৰত আন এগৰাকী কৰ্মচাৰী ৷ দুয়োজনৰে নাই কোনো ভ্ৰমণ ইতিহাস ৷ দুয়োৰে কোনো ধৰণৰ বিশেষ ভ্ৰমণ বৃত্তান্ত নাই যদিও প্ৰতিষ্ঠানটোৰ স্বত্বাধিকাৰী গৰাকীৰ পুত্ৰ গৰাকীয়ে প্ৰায়েই গুৱাহাটীলৈ গৈ থকা বুলি জানিব পৰা গৈছে ৷ ইতিমধ্যেই বিকানীৰ জুৱেলাৰীৰ কাষৰ ঠাইখিনিক কণ্টাইনমেণ্ট জ'ন হিচাপে ঘোষণা কৰিছে জিলা প্ৰশাসনে ৷
