নগাঁও, 6 ফেব্ৰুৱাৰী : চূড়ান্ত হোৱাৰ দিশে আগবাঢ়িছে দেশ কপোৱা অভি-নীল হত্যাকাণ্ডৰ গোচৰৰ বিচাৰ প্ৰক্ৰিয়া । নগাঁও আদালতত সাক্ষ গ্ৰহণ ডিফু ন্যায়াধীশৰ । ইতিমধ্যে সম্পন্ন হৈছে 51 জনৰ সাক্ষ গ্ৰহণ । আনহাতে, 16 জনৰ সাক্ষ গ্ৰহণৰ পিচতেই হ'ব চূড়ান্ত ৰায় । কম সময়ৰ ভিতৰতে দোষীয়ে শাস্তি লাভ কৰিব বুলি আশাবাদী নিলোৎপল-অভিজিতৰ পৰিয়াল ।
উল্লেখ্য যে, পাহাৰীয়া কাৰ্বি ভূমিৰ প্ৰাকৃতিক সৌন্দৰ্য উপভোগ কৰিবলৈ গৈ কেইজনমান পাষণ্ডৰ বৰ্বৰতাৰ বলি হৈ প্ৰাণ হেৰুৱাইছিল গুৱাহাটীৰ দুই প্ৰতিভাৱান যুৱক নিলোৎপল দাস আৰু অভিজিৎ নাথে । সকলোকে শিহৰিত কৰা ঘটনাটো সংঘটিত হৈছিল 2018 চনৰ 8 জুনত ।
ঘটনাৰ পিচতে হত্যাকাণ্ডৰ গোচৰত 47 জনকৈ অভিযুক্তক গ্ৰেপ্তাৰ কৰি ক্ষিপ্ৰতাৰে অভিযোগনামা দাখিল কৰিছিল ডিফু আৰক্ষীয়ে । সেই সময়ত ডিফু আদালতে 164 চি আৰ পি চিৰ অধীনত গ্ৰহণ কৰিছিল জবানবন্দী । পৰৱৰ্তী সময়ত নিলোৎপল-অভিজিতৰ পৰিয়ালৰ আবেদনৰ ভিত্তিত গুৱাহাটী উচ্চ ন্যায়ালয়ৰ নিৰ্দেশত নগাঁও আদালতত আৰম্ভ হয় গোচৰটোৰ বিচাৰ প্ৰক্ৰিয়া । এই গোচৰত এই পৰ্যন্ত 51 জনৰ সাক্ষ গ্ৰহণ কৰিছে নগাঁও আদালতে ।
অধিক পঢ়ক : যোৰহাট আৰক্ষীৰ বৃহৎ নাৰী দেহ চক্ৰ উৎখাত
ইফালে, ডিফু আদালতত জবানবন্দী গ্ৰহণ কৰা ডিফু আদালতৰ ন্যায়াধীশৰ সাক্ষাৎ গ্ৰহণ কৰে নগাঁও আদালতে । কেইদিনমান পূর্বে ডিফু আদালতৰ ন্যায়াধীশে প্ৰথমবাৰৰ বাবে সাক্ষ দান কৰাৰ পিচত শনিবাৰে নগাঁও আদালতত ন্যায়াধীশক জেৰা কৰে অভিযুক্ত পক্ষৰ অধিবক্তা মানস শৰণীয়াই ।
নগাঁও আদালতে ন্যায়াধীশ গৰাকীৰ উপৰিও ইৰাণী গগৈ নামৰ আন এগৰাকী সাক্ষীৰো সাক্ষ গ্ৰহণ কৰে । কিছুদিন পূৰ্বে দুই এজন সাক্ষীয়ে ভাষ্য সলনি কৰাক লৈ নীল-অভিৰ পৰিয়াল কিছু হতাশ হৈছিল যদিও অতি কম সময়ৰ ভিতৰত ন্যায় লাভ কৰিব বুলি আশাবাদী নীল, অভিৰ পৰিয়াল ।
অধিক পঢ়ক : ধুবুৰীৰ ৰাজপথত ট্ৰাকৰ দৌৰাত্ম
