নগাওঁ, 25 মাৰ্চ : নগাঁৱৰ কামপুৰত চাঞ্চল্য ৷ কামপুৰত পথৰ দাঁতিত উদ্ধাৰ এগৰাকী টেট শিক্ষকৰ মৃতদেহ । দুৰ্ঘটনাত পতিত হৈ মৃত্যু ঘটাৰ সন্দেহ প্ৰকাশ কৰিছে স্থানীয় ৰাইজে । কামপুৰ কঠীয়াতলী গড়কাপ্তানি পথৰ তেঁতেলীসৰাৰ বামুণ দলঙৰ ওচৰত আজি পুৱাৰ ভাগত স্থানীয় ৰাইজে প্ৰত্যক্ষ কৰে টেট শিক্ষকগৰাকীৰ মৃতদেহটো (Dead body recovered at Nagaon) ।
প্ৰাপ্ত বাতৰি মতে স্থানীয় ৰাইজে মৃতদেহটো প্ৰত্যক্ষ কৰি আৰক্ষীক খবৰ দিয়ে ৷ ইয়াৰ পিছতে আৰক্ষীয়ে ঘটনাস্থলীত উপস্থিত হয় ৷ পথৰ দাঁতিত পৰি থকা মৃতদেহটো তেঁতেলীসৰা মাহনিআটীৰ গিৰীন গগৈ বুলি চিনাক্ত কৰে স্থানীয় ৰাইজে । গিৰীন গগৈ কামপুৰ কান্দাপাৰা প্ৰাথমিক বিদ্যালয়ত কৰ্মৰত এগৰাকী টেট শিক্ষক বুলি স্থানীয় ৰাইজে জানিবলৈ দিয়ে (TET teacher dies due to poor roads at Kampur) ।
স্থানীয় ৰাইজে পথ দুৰ্ঘটনাত শিক্ষক জনৰ মৃত্যু হোৱা বুলি সন্দেহ কৰাৰ লগতে বান বিধ্বস্ত এলেকাটোৰ জৰাজীৰ্ণ পথৰ বাবে দুৰ্ঘটনাটো সংঘটিত হোৱা বুলি অভিযোগ উত্থাপিত কৰিছে । উল্লেখ্য যে বানে ধোঁৱা এলেকাটোত ৰাস্তা-ঘাট মেৰামতিৰ বাবে স্থানীয় বিধায়ক তথা ৰাজ্য চৰকাৰে আজিকোপতি কোনো ব্যৱস্থা গ্ৰহণ নকৰাত পথটিৰে বিপদসংকুলভাৱে যাতায়ত কৰিবলগীয়া হৈছে স্থানীয় ৰাইজে ৷ বাৰাম্বাৰ স্থানীয় বিধায়কক পথটি মেৰামতিৰ বাবে আবেদন জনাই অহা হৈছে যদিও বিষয়টো তথা সমষ্টিবাসীৰ সুবিধা-অসুবিধাৰ প্ৰতি স্থানীয় বিধায়কে কোনো গুৰুত্ব প্ৰদান নকৰাৰ অভিযোগ কৰে স্থানীয় ৰাইজে (Poor road condition in Nagaon) ৷
