নগাঁও, ১৭ জানুৱাৰী : আজি শিল্পী দিৱস । সমগ্ৰ ৰাজ্যজুৰি সোঁৱৰণ কৰা হৈছে ৰূপৰকোঁৱৰ, অসমীয়া বোলছবিৰ নিৰ্মাতা, গীতিকাৰ, নাট্যকাৰ, লেখক জ্যোতি প্ৰসাদ আগৰৱালাক । প্ৰতিবছৰে ১৭ জানুৱাৰীৰ দিনটো শিল্পী দিৱস হিচাপে পালন কৰা হয় । দেওবাৰে জ্যোতি প্ৰসাদ আগৰৱালাৰ স্মৃতিত ৰাজ্য়ৰ আকাশ বতাহ মুখৰ হয় ৰূপকোঁৱৰৰ কালজয়ী গীতেৰে । তেওঁৰ স্মৃতিত দেওবাৰে ৰাজ্যৰ ভিন্ন প্ৰান্তত বৰ্ণাঢ্য কাৰ্যসূচীৰে আয়োজন কৰা হয় শিল্পী দিৱস । কলিয়াবৰ শাখা সাহিত্য সভা, সদৌ অসম লেখিকা সমাৰোহ সমিতি, কলিয়াবৰ জিলা পৰিষদ আৰু কলিয়াবৰ কেন্দ্ৰীয় ছাত্ৰ সন্থাৰ সহযোগত কুঁৱৰীটোল উচ্চ মাধ্যমিক বিদ্যালয়ত উদযাপন কৰা হয় শিল্পী দিৱস ।
ৰূপকোঁৱৰক স্মৰণ কৰি কেইবাটাও অনুষ্ঠান উমৈহতীয়াকৈ উদযাপন কৰা হয় । বিভিন্ন প্ৰতিযোগিতাত স্থান লাভ কৰা বিদ্যালয়ৰ ছাত্ৰ-ছাত্ৰীক এই অনুষ্ঠানতে পুৰস্কৃত কৰা হয় । লগতে কলিয়াবৰ শাখা সাহিত্য সভাই আয়োজন কৰা সাহিত্যচাৰ্য্য মহিম বৰা সোঁৱৰণী গল্প প্ৰতিযোগিতাৰ শ্ৰেষ্ঠ প্ৰতিযোগীৰ নাম ঘোষণা কৰা হয় । ইয়াৰোপৰি এসময়ৰ ভ্ৰাম্যমান নাট্য দলৰ নৃত্য পৰিচালক লক্ষীধৰ বৰাকো এই অনুষ্ঠানত সম্বৰ্ধনা জনোৱা হয় ।
শিল্পী দিৱস উদযাপনৰ এই সভাত কুসুম ডেকাৰ কবিতা পুথি 'অথিৰ বিশ্ব' উন্মোচন কৰে শিক্ষক তথা লেখক গুণীন হাজৰিকাই । আজিৰ সভাতেই সমাদৃত কবিতাপুথি 'ৰাজপথৰ কবিতা'ৰ ত্ৰয়োদশ সংখ্যাটিও আনুষ্ঠানিকভাবে উন্মোচন কৰা হয় ।
লগতে পঢ়ক:বৰপেটাৰ মেধিৰটাৰীত মাঘ বিহু (পুষুৰা মেলা)ৰ নামত অশ্লীলতাৰ বেহা !
