নগাঁও, ২৯ নৱেম্বৰ: অহা ৮ ডিচেম্বৰত মুক্তি লাভ কৰিবলগীয়া বহু চৰ্চিত ছবি 'নেলীৰ কথা'ৰ দ্বিতীয়টো প্ৰমোশ্যনেল গীত মঙলবাৰে নগাঁৱত মুকলি কৰা হয় । মঙলবাৰে বিয়লি সাংস্কৃতিক গোষ্ঠী কল্লোলত অনুষ্ঠিত এক গাম্ভীৰ্যপূৰ্ণ অনুষ্ঠানত 'নেলীৰ কথা' ছবিখনৰ দ্বিতীয়টো প্ৰমোশ্যনেল গীত মুকলি কৰে বিশিষ্ট ছবি পৰিচালক অৰূপ মান্নাই । উল্লেখযোগ্য যে ১৯৮৩ চনত সংঘটিত নেলীৰ গণহত্যাক মূল বিষয় হিচাপে লৈ সংবেদনশীলতাৰে পাৰ্থজিৎ বৰুৱাই 'নেলীৰ কথা' চিনেমাখন নিৰ্মাণ কৰিছে । বিশেষকৈ মানৱতাক প্ৰতিষ্ঠাৰ উদ্দেশ্যেই নিৰ্মাণ কৰা নেলীৰ কথা অহা ৮ ডিচেম্বৰত ৰাজ্যৰ ছবিগৃহত মুক্তি লাভ কৰিব যদিও মুক্তিৰ পূৰ্বেই ছবিখনে লাভ কৰিছে ব্যাপক চৰ্চা ।
উল্লেখ্য় যে ১৯৮৩ চনৰ ১৮ ফেব্ৰুৱাৰীত নগাঁৱৰ (বৰ্তমানে মৰিগাঁও জিলা) নেলীত সংঘটিত হোৱা এই কৰুণ ঘটনাক আজিও পাহৰিব পৰা নাই অসমৰ কোনো এজন লোকেই । আনহাতে, নেলীৰ গণহত্যা এক হিংসাৰ ঘটনা যদিও ছবিখনত কোনো হিংসাত্মক দৃশ্য ৰূপায়ন কৰা নাই বুলি মন্তব্য কৰে ছবি খনৰ নিৰ্মাতা পাৰ্থজিৎ বৰুৱাই ।
