কলিয়াবৰ, 3 চেপ্তেম্বৰ: বাঁহ, কাঠ আৰু পেলনীয়া সামগ্ৰীক প্ৰাণ দিয়াত ব্যস্ত এগৰাকী অৱসৰপ্ৰাপ্ত শিক্ষক ৷ কলিয়াবৰত নৱ-প্ৰজন্মক শিল্প-কৰ্মৰ প্ৰতি আকৰ্ষিত কৰাৰ উদ্দেশ্যে এনে পদক্ষেপ গ্ৰহণ কৰিছে প্ৰাক্তন শিক্ষকগৰাকীয়ে ৷ শিল্প-কৰ্মৰ জৰিয়তে জীৱিকা নিৰ্বাহৰ বাট দেখুওৱাৰ লগতে, মূল্যবোধৰ শিক্ষা প্ৰদানৰ বাবে অহৰহ চেষ্টা কৰি গৈছে শিক্ষক তথা শিল্পীগৰাকীয়ে ৷ তেওঁৰ হাতৰ পৰশত প্ৰাণ পাই উঠিছে বাঁহ, কাঠ, পেলনীয়া সামগ্ৰীৰে নিৰ্মাণ কৰা ভাস্কৰ্য শিল্পই ৷
কলিয়াবৰৰ মাজ পূবথৰীয়া গাঁৱৰ বাসিন্দা নিত্যানন্দ বৰুৱা নামৰ ভাস্কৰ্য শিল্পী গৰাকীয়ে ভাস্কৰ্য শিল্পৰে ৰাইজৰ পৰা ভূয়সী প্ৰসংশা বুটলিবলৈ সক্ষম হৈছে ৷ প্ৰাথমিক বিদ্যালয়ৰ অৱসৰপ্ৰাপ্ত সহকাৰী শিক্ষক নিত্যানন্দ বৰুৱাই তেওঁৰ পিতৃ স্বৰ্গীয় গংগাধৰ বৰুৱাৰ পৰা পোৱা প্ৰাৰম্ভিক শিক্ষাৰে, সৰু কালৰে পৰা দুই-এপদকৈ সামগ্ৰী নিৰ্মাণ কৰি গৈছে ৷
বৰ্তমান তেওঁৰ হাতৰ পৰশত বাঁহ আৰু কাঠৰে নিৰ্মাণ কৰা ভাৰতৰ প্ৰধান মন্ত্ৰী নৰেন্দ্ৰ মোডীৰ স্বচ্চ ভাৰতৰ এক আৰ্হিয়ে প্ৰাণ পাই উঠিছে ৷ ইয়াৰোপৰি অসমীয়াৰ বাপতি সাহোন ৰঙালী বিহুৰ অন্যতম শ্ৰেষ্ঠ আকৰ্ষণ ঢুলীয়া আৰু নাচনী, ভিন্ন ধৰণৰ চৰাই, ফুলদানি, এশিঙীয়া গঁড় নিৰ্মাণ কৰাৰ লগতে, সম্প্ৰতি তেওঁ ব্যস্ত হনুমান আৰু ৰামৰ মূৰ্তি নিৰ্মাণত ৷ যদিহে নৱ-প্ৰজন্মই এই শিল্প বিধৰ প্ৰতি আকৰ্ষিত হয় তেনেহ'লে অনাগত দিনত নৱ-প্ৰজন্মক এই ভাস্কৰ্য শিল্পৰ শিক্ষা প্ৰদানৰ লগতে, মূল্যবোধৰ শিক্ষাৰেও তেওঁলোকক শিক্ষিত কৰাৰ ব্যৱস্থা গ্ৰহণ কৰিব বুলি জানিবলৈ দিয়ে শিল্পী গৰাকীয়ে ৷
