নগাঁও, ২৩ মাৰ্চ: মঙলবাৰৰ পৰা GST ফাঁকি দিয়া ব্যৱসায়ীৰ বিৰুদ্ধে নগাঁৱত অভিযান অব্যাহত ৰাখিছে বিক্ৰীকৰ বিভাগৰ এটা দলে । গুৱাহাটীৰ পৰা মঙলবাৰে নগাঁৱত উপস্থিত হোৱা বিক্ৰীকৰ বিভাগৰ দলটোৱে নগাঁৱৰ হোটেল পিয়ুছ ৰিজেঞ্চিত বাহৰ পাতি মঙলবাৰৰ পৰাই একাংশ ব্যৱসায়ীৰ বিৰুদ্ধে আৰম্ভ কৰিছে অভিযান ।
একাংশ ব্যৱসায়ীৰ GST ৰ নথি পৰীক্ষণৰ উদ্দেশ্যে সামগ্ৰী বিক্ৰীৰ সমূহ তথ্য বিচাৰি ব্যৱসায়ীসকলক তলব কৰিছিল বিক্ৰীকৰ বিভাগৰ দলটোৱে(Allegation of Cheating GST) । নগাঁও চহৰৰ হয়বৰগাঁৱৰ আগৰৱালা হাৰ্ডৱেৰ, সিদ্ধি বিনায়ক ষ্টীল আৰু শ্ৰী শ্যাম হাৰ্ডৱেৰৰ বিৰুদ্ধে বিক্ৰীকৰ বিভাগৰ দলটোৱে লাভ কৰা এটা অভিযোগৰ ভিত্তিত ব্যৱসায়িক প্ৰতিষ্ঠানকেইটাৰো তথ্য বিচাৰি মঙলবাৰে সন্ধিয়াই কৰিছিল তলব ।
নিশালৈকে কিছু তথ্য পৰীক্ষা কৰাৰ অন্তত ব্যৱসায়িক প্ৰতিষ্ঠান ক্ৰমে আগৰৱালা হাৰ্ডৱেৰ, সিদ্ধি বিনায়ক ষ্টীল আৰু শ্ৰী শ্যাম হাৰ্ডৱেৰৰ গুদাম ছীল কৰে বিক্ৰিকৰ বিভাগৰ দলটোৱে । এই তিনি ব্যৱসায়িক প্ৰতিষ্ঠানৰ বিৰুদ্ধে ভুৱা ভাউচৰেৰে (Invoice) সামগ্ৰী বিক্ৰী কৰাৰ অভিযোগ উত্থাপন হৈছিল । অৱশেষত বিক্ৰীকৰ বিভাগৰ দলটোৱে এই তিনি ব্যৱসায়িক প্ৰতিষ্ঠানৰ অনিয়ম ধৰা পেলাবলৈ সক্ষম হয় । ইয়াৰ পিছতে নিশাই ছীল কৰিলে এই তিনিখন ব্যৱসায়িক প্ৰতিষ্ঠান ৷
নগাঁৱৰ হোটেল পিয়ুছ ৰিজেঞ্চিত বাহৰ পাতি থকা গুৱাহাটীৰ বিক্ৰীকৰ বিভাগৰ দলটোৱে আন বহু ব্যৱসায়ীকো হোটেল পিয়ুছ ৰিজেঞ্চিলৈ তলব কৰা বুলি জানিব পৰা গৈছে । বিক্ৰিকৰ বিভাগৰ দলটোৱে দ্বিতীয় দিনাও অভিযান অব্যাহত ৰখাৰ খবৰে এতিয়া হাঁহাকাৰ লগাইছে আন একাংশ ব্যৱসায়ীৰ মাজত । নগাঁও চহৰৰ হয়বৰগাঁৱতেই বহু ব্যৱসায়ীক প্ৰতিষ্ঠানে GST ফাঁকিৰে ব্যৱসায় চলাই অহাৰো অভিযোগ উত্থাপন হৈছে ।
লগতে পঢ়ক: নথি-পত্ৰ নবীকৰণ নকৰা বাহনৰ বিৰুদ্ধে নিৰন্তৰ অভিযান পৰিবহণ বিভাগৰ
